आः प्रदेश समीकरणय् हिउपाः

येँ (नेपालभाषा टाइम्स)- संघीय सरकारय् सत्ता समीकरण हिलेवं आः प्रदेश–प्रदेशय् नं सत्ता समीकरण हिलीगु संकेत खने दया वःगु दु । केन्द्रय् सत्ता समीकरण हिलेवं केन्द्रपाखें हे प्रदेशय् सत्ता समीकरण हिलेगु निर्देशन बियाछ्वः कथं समीकरण हिलेगु ज्या जुइत्यंगु खँ सीदुगु दु ।

थुकी मध्ये बागमति प्रदेशय् थौं एमालेयात चीकाः बहालवाला मुख्यमन्त्रीं हे विश्वासया मत काइगु जुयाच्वंगु दुसा न्हूगु ‘कोशी’ प्रदेशय् नं एमालेया मुख्यमन्त्री हिक्मत कार्कीयात चीकेगु तयारी जुइधुंकूगु दु । अन निर्णायक जुयाच्वंम्ह जसपाया याकः सांसद नं आः सत्ता गठबन्धनय् वनेधुंकूगु दु ।

लुम्बिनी प्रदेशय् धाःसा एमालेया सरकारयात क्वःथःसां अन कांग्रेसं सरकार दयेकीगु जूगुलिं प्रदेशया माओवादी सांसदतय् दथुइ कचवं पिहां वःगु दु । थुकिं यानाः एमाले सरकारयात क्वःथलेगु खँय् हे विभाजन पिहां वःगु दु । नापं अन माओवादी संसदीय दलया नेता हिलेगु खँ पिहां वयेवं पार्टी दुने नं कचवं ब्वलंगु दु ।

केन्द्रय् सरकार हिलेवं प्रदेशय् नं स्वतः हे सरकार हिलेगु थ्व ज्यां यानाः नेपाःया संघीय व्यवस्था वास्तवय् प्रदेश सरकार धइगु केन्द्रया किपालु जक खः, संघीयताया मर्म कथं थुपिं परिचालित जुइ मफु धइगु खँ प्रमाणित जूगु खँ धयाहःगु दु । केन्द्रय् सत्ता समीकरण गडबड जुयाच्वंगु इलय् प्रदेशय् धिसिलाक्क सरकार चले यानाः क्यना बिल धाःसा जक प्रदेशतय् औचित्य दइ धकाः नं विज्ञतय्सं धयाहःगु दु ।