यल महानगरयात धू मुक्त यायेगु अभियान

यल – यल देय्यात धू मुक्त क्षेत्र दयेकीगु जूगु दु । यल महानगरपालिकां यल देय्यात शुन्य धू क्षेत्र अर्थात धू मुक्त यल महानगर दयेकेगु घोषणा याःगु खः । यल मनपां वंगु शनिवाः ग्वसाः ग्वःगु छगू वृहत अन्तरक्रिया ज्याझ्वः यासें प्राप्त सुझावकथं यल देय्यात धू मुक्त यायेगु घोषणा याःगु खः ।

यल मनपाया प्रवक्ता राजु महर्जनं जारी यानादीगु प्रेस विज्ञप्तीइ उगु खँ धयातःगु खः । विज्ञप्तीइ धयातःगु दु, ‘जिपिं यल महानगरपालिका, फोहरमैला व्यवस्थापन प्राविधिक सहयोग केन्द्र व यलया रोटरी क्लबतय्गु संजाल मंकाःकथं ल्हाःमाःहनाः वडा नं. १२ व १६ य् थ्व वइगु दछिया दुने धू मुक्त वडा दयेकेगु व वइगु प्यदँया दुने दक्वं महानगरपालिका क्षेत्रयात हे धू मुक्त यायेगु प्रतिवद्धता प्वंकाच्वना ।’

यल महानगरपालिकाया थ्व अभियानयात ग्वाहालि यायेत नं सक्रिय रुपं लगे जुइत नं सकल महानगरवासी, सम्बन्धित वडा व संघसंस्थायात इनाप नं याःगु दु ।