ने. सं. ११४४ कौलाथ्व तृतीया -

विद्युत माग स्वयां उत्पादन अप्वः

येँ- वंगु निदँ न्ह्यः तक नेपाःमि जनतां लोडसेडिङया मार फये मालाच्वंगु खःसा आः धाःसा नेपालय् माक्व स्वयां अप्वः मत उत्पादन जूगु दु ।
आः नेपाल विद्युत प्राधिकरणया प्रणालीइ १०० मेगावाट धइथें मत अप्वः उत्पादन जुयाच्वंगु दु । थौंकन्हय् मतया माग १२०० मेगावाट दुसा आयातित मत समेत यायेबलय् १३०० मेगावाट मत उत्पादन जुयाच्वंगु खँ नेपाल विद्युत प्राधिकरणया कार्यकारी निर्देशक कुलमान घिसिङं ‘नेपालभाषा टाइम्स’ यात कनादिल ।

वय्कःया कथं विद्युत प्राधिकरणया उत्पादनपाखें ४५० मेगावाट, निजी क्षेत्रं ३५० निसें ४०० मेगावाट मत उत्पादन जुयाच्वंगु दुसा भारतं ५०० मेगावाट मत आपूर्ति जुयाच्वंगु दु । नेपाःया अप्वः धइथें आयोजनात रन अफ रिभरय् चले जुइगु जूगुलिं वा वयेवं आन्तरिक उत्पादन नं अप्वइगु खः । नेपाःया आन्तरिक उत्पादन जक ९०० मेगावाट जुयाच्वंगु दु । तर आन्तरिक माग धाःसा १२०० मेगावाट दुगु खँ नं निर्देशक घिसिङं कनादिल ।

थौंकन्हय् तःधंगु आयोजना काली– गण्डकीं १४४ मेगावाट, मध्यमस्र्याङदीं ७० मेगावाट, तल्लोमस्र्याङदीं ६९ मेगावाट मत उत्पादन जुयाच्वंगु दु ।
नेपाल विद्युत प्राधिकरणया कथं थ्व फुक्कं आयोजनात थौंकन्हय् पूर्ण क्षमताय् चले जुयाच्वंगु दु । नेपालय् ९०० मेगावाट मत उत्पादन जुयाः मत सितिं वनाच्वंगु बारे न्यनागु न्ह्यसःया लिसः बिसें प्रमुख घिसिङं नेपालय् मत अप्वः उत्पादन जुल धाःसा भारतं आयात यायेगु म्हो जुइ, उकिं मत सितिं वनीगु समस्या मदुगु खँ कनादिल ।

वय्कलं बियादीगु जानकारी कथं थौंकन्हय् कुलेखानी आयोजनापाखें खास हे अप्वः मत उत्पादन यायेमाःगु आवश्यकता मदु । कुलेखानीयाके जक ९२ मेगावाट मत उत्पादन यायेगु क्षमता दु । प्राधिकरणया कथं कुलेखानी अप्वः चले यायेम्वाःगुलिं कुलेखानीया इन्द्र सरोवर ड्यामय् थौंकन्हय् लःया सतह नं ११०५ मिटर थ्यनाच्वंगु दु । थ्व वंगु दँय् स्वयां ५ मिटर अप्वः खः ।

नेपाल विद्युत प्राधिकरणं थुगु दँय् १५०० मेगावाट मतया माग जुइगु प्रक्षेपण याःगु खःसां नं १२०० मेगावाट जक माग जुयाच्वंगु दु । अथेहे औद्योगिक क्षेत्रया लागिं नं ३०० मेगावाट मतया व्यवस्था यानातःगु खःसां थौंकन्हय् २०० मेगावाट जक मत खपत जुयाच्वंगु दु ।
प्रमुख घिसिङं औद्योगिक क्षेत्रय् थौंकन्हय् २४ सै घन्टा मदिक्क मत बियाच्वनागु खँ नं कनादीगु दु ।