थौं नरसिंह अवतार क्यनाः कात्ति प्याखं क्वचाइ

यल- वंगु बुधवाः निसें थनया कात्ति दबुली क्यना वयाच्वंगु कात्तिप्याखं थौं क्वचायेत्यंगु दु । थुगुसी छवाःयंकं जक थ्व प्याखं क्यंगु खः ।
थौं विष्णुया नरसिंह अवतार क्यनाः थ्व प्याखं क्वचायेकी । म्हिगः मंगलवाः बिष्णुया बराह अवतार प्रदर्शन जूगु खः ।

न्हिंन्हिं बहनी लिबाक क्यनीगु थ्व प्याखनय् वराह व नरसिंह अवतार स्वयेगु लागिं यक्व मनूत वयेगु याइ । थुकी नरसिंहं हिरण्यकश्यपुयात प्वाःफायाः वध याइगु दृश्य क्यनीगु खः । न्हापा न्हापा थ्व दृश्य क्यनीबलय् गबलें गबलें हिरण्यकश्यपु जुइम्ह पात्रया धाथें हे ज्यान तकं वने फुगु खँ पुलांपिं मनूतय्सं कनेगु याः ।

कात्तिप्याखं नेपाः जक मखु विश्वया हे नाट्य परम्पराया लागिं छगू अजूचायापुगु प्रस्तुति खः । थनिं ३८० दँ न्ह्यः हे थुलि व्यवस्थित नाटक न्ह्यब्वयेगु नेपाःया नाट्यकला विश्वया लागिं हे छगू न्ह्यथनेबहःगु प्रस्तुति जूगु खँ वरिष्ठ संस्कृतिविद् सत्यमोहन जोशीं कनादी ।

यलया जुजु सिद्धिनरसिंह मल्लं देश व जनताया कल्याण जुइमा धइगु ताः तयाः थ्व प्याखं क्यनेगु शुरु याःगु खः । अबलय् २७ न्हु तक क्यनीगु थ्व प्याखंया श्रष्टा व प्रवर्तक सिद्धिनरसिंह मल्लया शिक्षा गुरु पं. हरिवंश उपाध्याय व दीक्षा गुरु विश्वनाथ उपाध्याययात माने याइ । थ्व कार्तिक लछि क्यनीगु जूगुलिं थुकियात ‘कात्ति प्याखं’ धाःगु खः ।