हेटौंडाया नेवाःतय् फुक्कं गुथि संगठित
हेटौंडा – सरकारं गुथि सम्बन्धी विधेयक हयाः नेवाःतय्गु गुथि परम्परा हे न्हंकेगु कुतः यानाच्वंगु झ्वलय् हेटौंडाया नेवाःतय्गु थीथी गुथित संगठित जूगु दु । नकतिनि जूगु थीथी गुथिया छगू भेलां ‘नेवाः गुथि खलः’ नांगु संगठन समेत नीस्वंगु दु ।
प्रदेश ३ या सभामुख सानुकुमार श्रेष्ठ मूपाहां कथं झाःगु उगु भेलां अनिल खड्गीया अध्यक्षताय् २१ म्ह दुजः दुगु तदर्थ समिति नीस्वंगु खः । खलःया न्वकु बिष्णुलाल श्रेष्ठ, रामकुमार मानन्धर व मेनका श्रेष्ठ च्वनादीगु दुसा मूछ्यांज्ये शुक्रराज जोशी, छ्यांज्ये बिष्णुकुमारी श्रेष्ठ, दांभरि बिष्णु श्रेष्ठ व लिउदांभरि भुवन जोशी जुयादीगु दु । अथे हे दुजलय् कृष्णबहादुर नगरकोटी, रामशरण बलामी, भीम श्रेष्ठ, अम्बिका देउला, चन्द्र शाही, रुपक बज्राचार्य, भुवन जोशी, केशब नकर्मी, धर्मलाल राजथला, कृष्ण महर्जन, रुपक कर्माचार्य व गणेश मानन्धर च्वनादीगु दु ।
ज्याझ्वलय् नेवाः देय् दबू मकवानपुरया निवर्तमान नायः देवप्रसाद श्रेष्ठ, नेवाः साँस्कृतिक पुचः मकवानपुरया नायः बिष्णुगोपाल महर्जन, अधिवक्ता रामकृष्ण देउलापिनि नं उपस्थिति दुगु खः । भेलाय् मकवानपुर जिल्लाय् परम्परांनिसें चले जुया वयाच्वंगु थीथी जातिया गुथिया प्रतिनिधितय्सं ब्वति काःगु खः । राज्यं गुथि परम्परा हे न्हंकेगु कथं कानून हयाच्वंगु विषयय् भेलाय् चिन्ता प्वंकेगु ज्या जूगु खः ।
LEAVE YOUR COMMENTS