किपुलिइ सांस्कृतिक संरक्षित क्षेत्रया ऐनयात कयाः सहलह

किपू (नेपालभाषा टाइम्स)- किपू नगरयात सांस्कृतिक संरक्षित क्षेत्र घोषणा यानाः जारी याःगु ऐन कार्यान्वय सम्बन्धय् सहलह ब्याकेगु ज्या जूगु दु । नेवाः देय् दबू किपू नगर समिति, ज्यापु महागुथि किपू नगर समिति, आदिवासी नेवाः राजनीतिक अभियान किपू नगर समिति, हलिं नेवाः गुथि किपू लगायत थीथी खलः पुचः जानाः आइतवाः मंकाः कथं उगु सहलह मुँज्या ग्वसाः ग्वःगु खः ।

किपुलिइ दुगु परम्परागत प्रथाजन्य संस्था सी गुथि, दाफा गुथि, जात्रा गुथि, बाजं गुथि नापं थीथी गुथिपाखें सच्छिम्हं मल्याक प्रतिनिधिपिनिगु सहभागीता उगु सहलह जूगु खः । नेवाः देय् दबू किपू नगर समितिया नायः बुद्धिलाल ज्यापुया नायोसुइ जूगु उगु ज्याझ्वलय् ऐन व नियमावली निर्माणया निंतिं कार्यदलया दुजः उज्ज्वल महर्जनं किपू नगरपालिकापाखें प्रथाजन्य संस्थायात सुचीकरणया नितिं फारम भरे याकूगु बारे खँ कनादीगु खः ।

अथे हे कार्यदलया मेम्ह दुजः अधिवक्ता नरेश श्रेष्ठं सांस्कृतिक संरक्षित क्षेत्र ऐन व नियमावलीया कानुनी खँ कनादीगु खः । अनं लिपा ब्वति कयादीपिं गुथिया प्रतिनिधिपिंसं न्ह्यसः तयादीगु खः । अन वःगु न्ह्यसःयायात कयाः सांस्कृतिक संरक्षित क्षेत्र घोषणाया ऐन व नियमावली निर्माण कार्यदलया कजि श्रीकृष्ण महर्जनं लिसः बियादीगु खः । आःया अवस्थाय् नियमावली दुथ्याःगु कथंया फारम भरे यायेगु ज्या सकलें छप्पँ जुयाः यायेमाःगु नापं ऐन कार्यान्वयनया निंतिं नं मंकाः कथं पहल यायेमाःगु खँ वय्कलं तयादीगु खः ।