येँ मनपाय् शिक्षक दरबन्दीया तयारी

येँ (नेपालभाषा टाइम्स) – येँ महानगरपालिकां नेपालभाषाया माध्यमं ब्वंकीगु स्थानीय पाठ्यक्रम लागू यायेगु निंतिं फुक्कं सामुदायिक विद्यालयय् दरबन्दी सिर्जना यानाः शिक्षक छ्वइगु जूगु दु । थुगु हे शैक्षिक सत्रंनिसें स्थानीय पाठ्यक्रम लागू यायेगु धाःसां नं कोरोना संक्रमणया कारणं लागू याये मफुगु खँ येँ महानगरपालिकाया शिक्षा विभागया प्रमुख नमराज ढकालं कनादीगु दु ।

वय्कःया कथं येँ मनपाय् जक थौंकन्हय् ९१ गू सामुदायिक विद्यालय व ५४१ गू संस्थागत विद्यालय दु । थ्व फुक्कं विद्यालयतय्सं थ्वहे वइगु शैक्षिक सत्रंनिसें अनिवार्य रुपय् आधारभूत तहलय् स्थानीय पाठ्यक्रम ब्वंकेमाःगु व्यवस्था दु । येँ मनपां थुकिया लागिं पाठ्यसामग्री तयार यायेधुंकूगु दु । येँ मनपां संस्थागत विद्यालय पाठ्य सामग्री छ्वयेगु व सामुदायिक विद्यालयय् न्हूगु दरबन्दी सिर्जना यानाः शिक्षक छ्वयेगु तयारी जुयाच्वंगु दु ।

स्थानीय भाषा व संस्कृति बारे जानकारी बीत छगू तगिंनिसें च्यागू तगिं तक अनिवार्य स्थानीय पाठ्यक्रम ब्वंकेगु तयारी जुयाच्वंगु दु । उगु पाठ्य सामग्री १०० पूर्णाब्कया जुइ । स्थानीय पाठ्य सामग्री ब्वंकेगु बारे येँ मनपाया न्यय् कार्यपालिका बैठकं नं निर्णय यायेधुंकूगु दु । लिसें उगु बैठकं शिक्षकपिंत प्रशिक्षण बीगु निर्णय नं याःगु खः । शिक्षक दरबन्दीया लागिं येँ मनपां छगू बिस्कं समिति नीस्वनाः ज्या न्ह्याकेगु धकाः नं निर्णय
जुइधुंकूगु दु । येँ मनपाय् सामुदायिक विद्यालयय् ४२ हजार व संस्थागत विद्यालयय् २ लाख २० हजार विद्यार्थी ब्वनाच्वंगु दु ।