भारतं पेट्रोल बीगु बन्द यायेत्यंगु खः ला ?

येँ – प्रधान मन्त्री कार्यालयया बिना विभागीय राज्यमन्त्री उमेश श्रेष्ठ व नेपाल आयल निगमया प्रवक्ता विनितमणि उपाध्यायया खँय् ट्वीस्ट वःगु दु । म्हिगः छगू ज्याझ्वलय् न्ववासें राज्यमन्त्री श्रेष्ठं भारतं पेट्रोलियम पदार्थया ध्यबा मपुल धाःसा चिकं पनेगु ख्याच्वः बिउगु खँ धयादीगु खः ।

तर आयल निगमं धाःसा ध्यबा मपुल धाःसा पेट्रोलियम पदार्थ छ्वया हयेगु दिकेगु धइगु धाःगु बारे आः तक छुं कथंया औपचारिक जानकारी मवःनिगु खँ धाःगु दु । निगमया प्रवक्ता उपाध्यायं थज्याःगु खँ थम्हं न्हापांखुसी न्यनागु खः धकाः नं धयादीगु दु ।

राज्यमन्त्री श्रेष्ठं थम्हं उद्योग, वाणिज्य तथा आपूर्ति मन्त्री दिलेन्द्रप्रसाद बडुयात नापलानागु इलय् थज्याःगु जानकारी वःगु धासें धयादिल, ‘जिं नकतिनि उद्योगमन्त्रीजुयात नापलाना वया । २३ अर्ब पुले मानि धाल । पुले मफुत धाःसा पेट्रोलियम पदार्थ बीमखु धकाः भारतं धयाच्वंगु दु ।’

मेखे निगमया प्रवक्ता उपाध्यायं धाःसा पेट्रोलियम पदार्थ पनेगु खँया जानकारी थःपिंत मदु धासें यदि भारतीय पक्षं अज्याःगु खँ धाःगु दुसा थःपिंत जानकारी दयेमाःगु खः धयादीगु दु ।

प्रवक्ता उपाध्यायं निगमयात आः मुक्कं २३ अर्ब घाटा जुयाच्वंगु धासें निगमं थीथी स्रोतं ध्यबा मुंकाः भारयात पुलाच्वनागु खँ धयादीगु दु । वय्कलं धयादिल, ‘भ्याट लित कायेग् प्रक्रियाय् दु । बैंकं त्यासा कायेगु खँ नं न्ह्यानाच्वंगु दु, निगमं पेट्रोलियम पदार्थ मियाः वयाच्वंगु ध्यबा भारतीय आयल निगमयात नियमित भुक्तानी यानाच्वनागु दु ।’