‘पार्टी नेतृत्वय् नं मिसा व मिजं दयेमाः’

येँ – महासमिति बैठकय् ब्वति काः वःपिं मिसा प्रतिनिधितय्सं कडा रुपं विरोध याःगु कारणं आः नेपाली कांग्रेसया थीथी कमिटीइ नं संविधानय् व्यवस्था यानातः थें हे मिसा प्रतिनिधिया ल्याः ३३ प्रतिशत थ्यंकीगु जूगु दु । महासमिति बैठकया उलेज्या जूगु न्हि कुन्हु हे नेतृ चित्रलेखा यादवं कांग्रेसयात मिसा नेतृ धइपिं गबलें हे म्वाःगु खः ला धकाः न्ह्यसः तसें पार्टीइ मिसापिंत थाय् मबिउगु बारे टिप्पणी यानादीगु खः ।

आः मिसा प्रतिनिधिपिनि माग कथं सदस्य संख्या ३३ प्रतिशत खाकेगु ज्या जूसां मिसा नेतृतय्सं अझ नं असन्तुष्टि क्यंगु दु । राज्यया थीथी निकायय् प्रमुख मिसा जूसा उपप्रमुख मिजं अले प्रमुख मिजं जूसा उपप्रमुख मिसा जुइमाः धकाः तयातःगु प्रावधान आः पार्टीया नेतृत्व तहलय् नं किटान हे यानाः लागू यायेमाःगु माग उमिसं याःगु दु ।

सदस्य संख्या ३३ प्रतिशत थ्यंकेगु कुतः सकारात्मक जूसां नेतृत्व तहलय् मिसापिंत नं सहभागी यायेगु ज्या धाःसा अझं मजूनिगु खँय् मिसापिंसं असन्तुष्टि प्वंकूगु खः । राज्यया थीथी अंगया प्रमुख व उपप्रमुख पदय् लैंगिक समानता जुइमाः धकाः संविधानय् हे व्यवस्था यानातः थें आः पार्टीया नेतृत्वकारी पदय् नं अज्याःगु हे लैंगिक समानताया नीति ज्वने माःगु माग नं मिसा नेतातय्सं तयाच्वंगु दु ।

पार्टी नेतृत्वय् मिसापिनि सहभागिता म्हो जूगु बारे सत्तारुढ दल नेपाल कम्युनिष्ट पार्टीइ नं खँ पिहां वयाच्वंगु दु । नेकपाया स्थायी समितिइ मिसापिनि ल्याः १७ प्रतिशत जक दुगु जुयाः थुकियात बढे यायेमाःगु माग जुयाच्वंगु दु ।