नागरिकता संशोधन विधेयकय् नेकपा : ब्याहा यानावःगु न्हय्दँ लिपा बीगु

येँ (नेपालभाषा टाइम्स) – नेकपाया सचिवालय बैठकं नेपाली मिजं लिसे ब्याहा याना वःम्ह विदेशी मिसायात ब्याहा याना वयाः नेपालय् च्वनाच्वंगु न्हय्दँ लिपा अंगिकृत नागरिकता बीगु क्वःछिउगु दु। नेपाःमिलिसे ब्याहा याना वःम्ह मिसायात नागरिकता बीगु खँय् ताःई न्ह्यव निसें विवाद वयाच्वंगु खः । थ्व हे विवादयात सम्बोधन यायेकथं म्हिगः नेकपाया सचिवालयया बैठकं थ्व निर्णय याःगु खः ।

प्रधानमन्त्री निवास वालुवाटरय् शनिवाः च्वंगु नेकपा सचिवालयया बैठक निर्णय न्यंकुसें नेकपाया प्रवक्ता व सचिवालय दुजः नारायणकाजी श्रेष्ठं धयादीगु दु, ‘थौंया बैठकय् संसदय् विचाराधीन नागरिकता विधेयकया थीथी प्रावधान बारे सहलह जुल । सहलह लिपा नेपाली मिजं लिसे ब्याहा याना वःम्ह विदेशी मिसायात अंगिकृत नागरिकता बीगु प्रावधान बारे सहलह यानाः निष्कर्ष पिकाःगु दु। नेपाली नागरिक मिजं लिसे ब्याहा याना वःम्ह विदेशी मिसाया हकय् न्हय् दँ तक देय् दुने हे च्वनाच्वंगु पुष्टि जुल धायेवं विदेशय् नागरिकता कयातःगु वा अज्याःगु छुं प्रमाणपत्र कयातःगु दुसा उकियात त्याग यायेगु प्रक्रिया न्ह्याकूगु प्रमाण पेश यायेधुंकाः सम्बन्धित मिसां वैवाहिक अंगिकृत नागरिकता कायेदइ धयागु निष्कर्ष पिकाःगु दु।’

नेपाःमि मिजंलिसे ब्याहा याना वःम्ह मिसां सामाजिक, सांस्कृति, आर्थिक सम्पूर्ण अधिकार काये दइ कथं आवासीय परिचय पत्र धाःसा ब्याहा याना वयेवं हे कायेदइगु खँ नं प्रवक्ता श्रेष्ठं धयादीगु दु ।

मेखे नेपाली कांग्रेस लिसें मधेस केन्द्रीत दलत धाःसा नेपाःमि मिजंलिसे ब्याहा याना वःम्ह मिसां तुरुन्त हे नागरिकता कायेदइगु आःया व्यवस्था हे जुइमाः धयाच्वंगु दु। उकिं नेकपां आः संसदय् बहुमतया आधारय् जूसां सचिवालयं याःगु निर्णय कथं विधेयक पारित याइगु खँ धाःगु दु। सचिवालय् दुने नं बहुमतया आधारय् जूसां न्ह्याःवनेगु सहमति जूगु खँ धाःगु दु ।

ब्याहा याना वःम्ह विदेशी मिसायात नागरिकता बीगु प्रावधानया कारणं हे थ्व विधेयक वंगु निदँ न्ह्यवनिसें राज्य व्यवस्था तथा सुशासन समितिइ थानाच्वंगु खः । छुं न्हि न्ह्यव समितिया अध्यक्ष शशी श्रेष्ठं न्हय्दँ लिपा हे जक नागरिकता बीगु प्रावधान कथं समितिं पारित यायेत स्वःगु खः, तर थुकियात हाकनं नेकपाया हे आन्तरिक कारणं दिकातःगु खः । आः नेकपाया सचिवालयया सहमति लिपा समितिं न्हय्दँया प्रावधान कथं हे पारित याना छ्वइगु जुइ । समितिया अध्यक्ष शशी श्रेष्ठ नेकपाया हे सांसद खः ।

मेखे नेपाःमि मिसालिसे ब्याहा याःम्ह विदेशी मिजंयात नं अंगीकृत नागरिकता बीगु धाःसा नेकपा सचिवालयं अस्वीकृत याःगु दु। नेकपाया मिसा सांसदतय्सं थ्व माग तया वयाच्वंगु खःसा थुकियात सचिवालय दुजः श्रेष्ठं हे सचिवालय बैठकय् नं न्ह्यब्वयादीगु खः । तर सचिवालयया मेमेपिं नेतात धाःसा थुकी सहमत जूगु खँ धाःगु दु ।