धनुषाया संक्रमित मनू नेपाल टेलिकमया कर्मचारी, वैशाख १४ गते येँ वःम्ह

येँ – सोमवाः धनुषाया कोरोना संक्रमित जुम्ह २८दँया मिजं नेपाल टेलिकमया येँया सुन्धारा ज्याकूथी ज्या याइम्ह कर्मचारी (स्वंगूगु पक्षीय कर्मचारी) जूगु खँ सीदुगु दु ।

संक्रमित मनू सुन्धाराया ज्याकूथीइ गार्ड व गाडी चालकया रुपय् ज्या याइम्ह खः । लकडाउन जुइधुंकाः धनुषाया लक्ष्मीनियाँ गाँउपालिकाय् च्वंगु थःगु छेँ वनाच्वम्ह उम्ह मनू वैशाख १४ गते जक येँ वःगु खः । येँ वयेधुंकाः ड्युटीइ मयानीसां उम्ह मनू छुं ई न्ह्यः जक बबरमहलय् च्वंगु नेपाल टेलिकमया ज्याकूथी नं थ्यंगु खँ सीदुगु दु ।

थ्वहे झ्वलय् टेलिकमया कर्मचारीयात कोरोना संक्रमण जूगुलिं आः अन मेपिंत नं परीक्षण यायेगु तयारी जुयाच्वंगु दु । टेलिकमया प्रवक्ता राजेश जोशीं कोभिड-१९ संकट व्यवस्थापन केन्द्र (सीसीएमसी) नापया समन्वयय् कन्ट्याक्ट ट्रेसिङ यानाः परीक्षण जुइगु खँ धयादिल ।