स्वनिगलय् मेलम्चीया लः हानं वइ मवइ ठेगान मंत

येँ -स्वनिगःया जनतां दशकौं तक प्रतीक्षा यानाःलि बल्ल तल्ल वःगु मेलम्चीया लः आः हानं वइगु खः लाकि मखु अनिश्चित जूगु दु । मेलम्ची लागाय् प्यन्हुजालय् हानं वःगु खुसिबालं मेलम्ची परियोजनाया भविष्य हे अस्पष्ट याना बिउगु खँ विज्ञतय्सं धाःगु दु । नापं उमिसं थौं गुगु थासय् मेलम्ची परियोजना दयेकूगु खः, व थाय् ल्ययेगु ज्याय् हे तःधंगु गल्ती जूगु दयेमाः धकाः समेत धयाहःगु दु ।

प्यन्हुजालय् वःगु खुसिबाः लिपा मेलम्चीया च्वय्पाखे हेलिकप्टरं निरीक्षण याना वःपिं व उगु निरीक्षण भिडियो फुटेज स्वःपिं विज्ञतय्सं आः मेलम्ची परियोजनाया भविष्य अनिश्चित जूगु बिचाः तयाहःगु खः ।

लिपा वःगु खुसिबाः लिपा मेलम्चीया लखय् चुन थेंज्याःगु तत्व यक्व ल्वाक ज्याना वःगु जुयाः थ्व लः तुरुन्त प्रयोग याये मफइगु खँ धाःगु दु । न्हापा वःगु खुसिबालं मेलम्ची परियोजनाया भौतिक पूर्वाधारत ध्वस्त याना बिउगु खः । आः लिपा वःगु खुसिबालं थ्व पूर्वाधारत द हे दयेकल धाःसां नं उकिं लः आपूर्ति याये मफइगु अनुमान याना हःगु दु ।
थज्याःगु अवस्थाय् मेलम्चीया सुरुङ छगू जक ज्या वइगु व उगु सुरुङय् लः तयेगु खःसा आः अन मेगु हे स्रोतं लः हये मालीगु अवस्था वयेफु धकाः नं धाःगु दु । थ्व सुरुङय् मेगु स्रोतं लः हयेगु सम्भव मदुगु विज्ञतय् धापू दु ।

मेलम्ची खुसिइ लिपांगु इलय् हानं खुसिबाः वःगुया कारण आः तक पत्ता लगे मजूनि । अन खुसिबाः जक मखु पहाड चलः वनाः ल्वाकज्याःगु फि व चा तकं बाः वयाच्वंगु दु । थ्व छाय् बाः वल व गबलय् तक वइ धकाः आः तक सी मदुनि । मेलम्चीया खुसिया स्वभाव बारे न्हापा पूवंक अध्ययन मयाःगु खने दुगुलिं आः थुकिया समेत अध्ययन यानाः जक पलाः छीमालीगु खँ नं धाःगु दु ।