सांसद यादव अपरहण मुद्दा : सरकारी वकिल कार्यालयं नं उजुरी मकाल

येँ – जिल्ला सरकारी वकिल कार्यालयं नं समाजवादी पार्टीया सांसद डा. सुरेन्द्र यादवया अपहरण जूगु मुद्दाया जाहेरी कायेत अस्वीकार याःगु दु । समाजवादी पार्टी तछ्यायेगु निंतिं यादवयात निर्वतमान प्रहरी महानिरीक्षक सर्वेन्द्र खनाल, सांसदपिं महेश बस्नेत व किसान श्रेष्ठं अपहरण यानाहःगु धासें जनता समाजवादी पार्टीया नेतात सरकारी वकिल कार्यालयय् थौं मंगलवाः जाहेरी बिउ वंगु खः ।

आइतवाः महानगरी प्रहरी परिसर टेकुइ जाहेरी बिउवंबलय् महोत्तरीइ जूगु घटना येँय् जाहेरी काये मिले मजू धासें जाहेरी मकाःगु खः । थ्व लिपा नकतिनि एकीकरण जूगु जनता समाजवादी पार्टीया नेतात बाबुराम भट्टराई, राजेन्द्र महतो, राजेन्द्र श्रेष्ठपिं सरकारी वकिल कार्यालयय् जाहेरी बिउवंगु खः ।

सरकारी वकिल कार्यालर्य जाहेरी दर्ता यायेत न्हय्न्हुया ई बीत धाःगु खःसा जसपाया नेतातय्सं थौं हे जोहरी दर्ता यायेमाःगु अडान काःगु खः । सरकारी वकिल कार्यालयं नं जाहेरी मकायेवं नेतात लिहां वःगु दुसा आः छु यायेगु धयागु निर्णय धाःसा मयाःनिगु खँ धाःगु दु ।

मेखे नेकपाया छथ्वः ल्याय्म्ह कार्यकर्तात नं बाबुराम भट्टराई विरुद्ध उजुरी बीत थौं हे सरकारी वकिल कार्यालय् वनाच्वंगु दु । भट्टरार्इं रेडियो नेपालय् अन्तर्वार्ता बिइगु झ्वलय् प्रधानमन्त्री केपी ओलीयात भष्मासुर, पंगु, निरंकुश सरकार धाःगु धासें वय्कः विरुद्ध उजुरी बिइत सरकारी वकिल कार्यालयय् वंगु खः ।