स्थापित ल्याय्म्ह पुचःया फुटसल

येँ(नेपालभाषा टाइम्स)- स्थापित ल्याय्म्ह पुचःया ग्वसालय् वंगु माघ ७ व ८ गते निन्हुयंकं फुटसल कासा जुल । पुचःया ग्वसालय् जूगु ‘उदाय फुटसल कप–२०२३’ वाफलय् च्वंगु युनाइटेड फुटसल ग्राउण्डय् जूगु खः ।

उगु फुटसलय् न्यत तुलाधरया टीम न्हाप लाःगु दुसा असं तुलाधर पुचः लिउ व ताम्राकार पुचलं लियांलिउ लाकेत ताःलाःगु खः । कासाय् विजयी जूपिंत उदाय समाजया न्वकु डा. पे्रमरत्न स्थापितं शील्ड, ट्रफी व स्थापित खलःया नायः दीपक स्थापितं दसिपौ लःल्हानादीगु खः । अथे हे खलःया कोषाध्यक्ष लक्ष्मण स्थापितं नगद सिरपाः लःल्हानादीगु खः ।

थ्व स्वयां न्ह्यः उगु फुटसल कासाया उलेज्या येँ क्षेत्र नं ८या प्रतिनिधिसभा सदस्य विराजभक्त श्रेष्ठं रेफ्रीयात बलः हस्तान्तरण यानाः यानादीगु खः । न्यत तुलाधरया निगू पुचः, असं तुलाधर, ताम्राकार, स्थापित खलःया निगू पुचः व कंसाकार पुचलं ब्वति काःगु कासाय् संयोजक नितिजा स्थापितं कासाया बारे जानकारी बियादीगु खः । उगु इलय् स्थापित मिसा व न्यत मिसा पुचःया मिजंतय् निगू पुचःया दथुइ नं मैत्रीपूर्ण कासा जूगु खः ।