ने. सं. ११४४ कछलागा पञ्चमी -

विश्वकप पुलुपालु

उपाधि निगू, तारा प्यंगू !
फिफाया नियमकथं विश्वकप उपाधि त्याकेधुंकूगु देशं थःगु जर्सीइ ‘स्टार’ (तारा) तये दइ । ग्वःक्वः तक उपाधि त्याकूगु खः, जर्सीइ नं उलि हे तारा दइ । थ्व ल्याखं न्याक्वःतकया विश्व विजेता ब्राजिलया जर्सीइ न्यागू, इटाली व जर्मनीया जर्सीइ प्यंगू, तारा दु । अथे हे अर्जेन्टिनाया जर्सीइ निगू तारा दुसा उरुग्वेया जर्सीइ नं निगू हे तारा दयेमाःगु खः ।

तर उरुग्वेया जर्सीइ निगू मखसे प्यंगू तारा दु । थ्व खँ शायद म्हो स्वकुमिपिंसं वाः चायेकूगु दयेमाः । सन् १९३० य् थःगु हे देशय् जूगु न्हापांगु संस्करण व सन् १०५० यानाः उरुग्वें निक्वःतक विश्वकप उपाधि त्याकूगु खः । अय्नं वयागु जर्सीइ निगू मखु प्यंगू तारा दु । थथे छाय्ले ? न्ह्यसः दनेफु ।

सन् १९३० य् थःगु हे देशय् जूगु न्हापां विश्वकप स्वयां न्ह्यः उरुग्वें विश्व फुटबलया हे दकलय् तःधंगु, न्हापांगु व आधिकारिक कासा रुपय् जूगु ओलम्पिकय् स्वर्ण त्याकूगु खः । सन् १९२४ व १९२८ य् जूगु ओलम्पिकय् स्वर्ण त्याकू व न्हापांगु विश्वकप आयोजना जिम्मवारी कयाः सफतापूर्वक संचालन याःगु वापत उरुग्वेयात थुकथंया अवसर चूलाःगु खः ।

अर्थात उरुग्वें प्यक्वःतक आधिकारिक रुपं थःत विश्व विजेताया रुपय् प्रस्तुत याःगु आधारय् फिफां हे मान्यता बियाः वयागु जर्सीइ प्यंगू तारा तयेगु अनुमति बिउगु खः ।

फायर अलार्म आतंक
रसिया विश्वकप फुटबया झ्वलय् स्वीडिस कासामितय्सं छगू अजू चायापुगु स्थितिया सामना यायेमाल । रुस विश्वकप अन्तर्गत क्वार्टरफाइनल कासा जुइ न्ह्यः स्वीडेनया कासामि च्वनाच्वंगु होटलय् आकाझाकां ‘फायर अलार्म’ न्यात । गुकिं यानाः उगु होटल खाली यायेमाःगु जुल ।

घटना जूगु छन्हु लिपा हे स्वीडेनं इंग्ल्याण्ड विरुद्ध क्वार्टरफाइनल म्हिेत माःगु खः । कासामिपिं दने न्ह्यः हे ‘फायर अलार्म’या सः तायेवं होटलय् च्वंपिं सकलें दनाः पिहां वःगु खः । अले कासामिपिं च्वनाच्वंगु क्वथा नं खाली यानाः इमित पिने हःगु खः ।

वास्तवय् फायर अलार्म गल्तीवस न्याःगु खः । फायर अलार्म न्यायेधुंकाः होटलय् मिं नयेगु वा अज्याःगु छुं नं अप्रिय घटना धाःसा मजुल । गुकिं यानाः कासामिपिं सकलें हाकनं थःथःगु क्वथाय् द्यं वंगु खः ।

विश्वकप किप युरो ?
रुसय् जुयाच्वंगु विश्वकपयात कयाः छगू न्हूगु चर्चा जुयाच्वंगु दु । विश्वकप वा युरोकप ? थथे धकाः चर्चा यानाच्वंपिनिगु खँ असत्य नं मखु । वास्तवय् झी सकसिनं सिउ कि थ्व विश्वकप हे खः ।

तर आः सेमीफाइनलया यात्रा याःगु देय्यात लिधंसा कयाः धायेगु खःसा थुकियात युरोकपया दर्जा बिउसां पाइमखु । छाय्कि थुगुसीया विश्वकप गुगुं छगू युरोपेली देशं त्याकीगु पक्का दु ।

न्हापांगु क्वाटरफाइनल कासाय् उरुग्वे व उपाधिया प्रमुख दावोदार नापं न्याक्वःतकया उपाधि विजेता ब्राजिलया यात्रा क्वचायेवं आः रुस विश्वकपय् ल्यनाच्वंगु धइगु युरोपेली राष्ट्र हे जक खः ।

आः विश्वकप उपाधि ल्ह्वनेगु लँय् दुगु धइगु फ्रान्स, इंग्ल्याण्ड, बेल्जियम व क्रोएसिया खः ।थुपिं दक्वं युरोपेली देय् खः ।सन् २००२ लिपा आतकया दक्वं विश्वकप युरोपेली देशं हे जक त्याका वयाच्वंगु दु ।

सन्् २००२ लय् दकलय् लिपांखुसी दक्षिण अमेरिकी देय् ब्राजिलं त्याकूगु खः । वयां लिपा सन् २००६ लय् इटाली, सन् २०१० य् स्पेन व २०१४ या उपाधि जर्मनीं न्याकूगु खः ।