एक्स्ट्रा इलय् निगू गोल यासें इटली क्वार्टरफाइनलय्

येँ – एक्स्ट्रा इलय् जूगु निगू गोल यासें इटली अस्ट्रियायात २–१ गोलं बुकाः युरो कप २०२० या क्वार्टरफाइनलय् दुहां वनेत ताःलाःगु दु । इटलीया निंतिं छगू जक गोल फेड्रिको चेइसां याःगु खः । कासाया ९५ औं मिनेटय चेइसां न्हापांगु गोल याःगु खःसा कासाया १०५ औं मिनेटय् म्याथियो पेसिनां छगू गोल यासें विजय सुनिश्चित याःगु खः ।

नियमित ९० मिनेटया ई तक निगुलिं टिमं गोल याये मफयेवं कासा एक्ट्रा इलय् वंगु खः । कासाया ११४ औं मिनेटय् अस्ट्रियाया निंतिं कालाजिकं छगू गोल याःगु खः । थुगुसीया युरो कपया नकआउट चरणय् एक्स्ट्रा इलय् वंगु थ्व न्हापांगु कासा खः ।

मेखे इटलीं ३१ गू कासा तक अपराजित यात्रा यासें थःपिनिगु न्हापायागु रेकर्डया बराबरी याःगु दु । इटली २०१८ निसें म्हितूगु ३१ गू कासाय् आःतक छक्वः नं पराजित जूगु मदुनि । तर लिपांगु झिनिगू कासाय् गोल नःगु धाःसा थ्व हे कासाय् न्हापांगु जूगु दु । मखुसा थ्वयां न्ह्यःया झिंछगू कासाय् तक इटलीं गोल छगू तकं नःगु मदुनि ।

थ्वयां न्ह्यः सन् १९३४ निसें १९३८ तक इटलीं ३१ गू कासा तक छगू हे कासाय् पराजित मजूगु कीर्तिमान तयातःगु खः । उबलय् इटलीं १९३४ व ३८ या विश्वकप उपाधी नं त्याकूगु खः ।

सम्बन्धित बुखँ

LEAVE YOUR COMMENTS