कोरोनां नेपालय् न्हापांगु मृत्यु !

धुलिखेल अस्पतालय् उपचारय् संलग्नपिंत क्वारेन्टाइनय्र तयेगु तयारी

येँ – धुलिखेल अस्पतालय् उपचारया झ्वलय् सीम्ह छम्ह मिसायाके कारोना पोजिटिभ पुष्टि जूगु दु । उम्ह मिसा सासः ल्हाये थाकुगुलिं यानाः हे अस्पताल हःगु जूगुलिं कोरोनाया कारणं हे सीगु अनुमान याःगु दु । तर आधिकारिक रुपं स्वास्थ्य मन्त्रालयं धाःसा कोरोनां हे सीगु धकाः घोषणा याःगु मदुनि ।

सासः ल्हाये थाकुइवं सिन्धुपाल्चोकया बाह्रबिसें उपचारया निंतिं धुलिखेलय् अस्पताल हःम्ह उम्ह मिसा बिहिवाः चान्हय् सीगु खः । वयात सासः ल्हायेत समस्या दुगु व उच्च ज्वरो खनेदयेवं पिसिआर विधिं कोरोना टेस्ट याना स्वःगु खः । टेस्टया रिपोर्ट पोजिटभ वयेवं वयागु उपचारय् संलग्नपिं झिम्ह स्वास्थ्यकर्मीतय्त क्वारेन्टाइनय् तयेगु तयारी याःगु दु ।

उम्ह मिसा वंगु वैशाख २३ गते शिक्षण अस्पताल महाराजगञ्जय् मचा बुइकावःम्ह खः । २५ गते जक बाह्रबिसेया छेँय् लिहां वःम्ह उम्ह मिसाया स्वास्थ्यय् समस्या जुइवं धुलिखेल अस्पताल हःगु खः । अस्पताल हःबलय् उम्ह मिसाया अवस्था गम्भीर जुइधुंकूगु व सासः ल्हायेत तकं थाकुइधुंकूगु खँ अस्पताल स्रोतं धाःगु दु ।

शिक्षण अस्पतालय् छुं न्हि न्ह्यव छम्ह अपरेशन यायेत्यंम्ह छम्ह मिसामचायाके कोरोना पोजिटभ खनेदुगु खः । उम्ह मचायात विरामी स्वःम्ह मनुखं कोरोना सरे यानाथकूगु खः ।

सीम्ह मिसायाके कोरोना पुष्टि जुइवं अस्पतालय् उच्च सतर्कता नालाच्वंगु दुसा अनया इमर्जेन्सि वार्ड तकं बन्द यायेधुंकूगु दु । छुं ई न्ह्यव जक अस्पतालया उच्चस्तरीय टास्कफोर्सया दथुइ अनलाईन बैठक च्वनाः उपचारय् संलग्नपिंत क्वारेन्टाइनटय् तयेगु क्वःछिउगु खः ।
उम्ह मिसाया थःथितिपिनिगु नं स्वाब संकलन यायेधुंकूगु दु ।