गठबन्धन स्यंकेगु लागिं केपी ओलीया खेल
येँ (नेपालभाषा टाइम्स)÷प्रदेश नं. १ अर्थात कोशी प्रदेशय् मुख्यमन्त्री ल्ययेगु झ्वलय् आपालं अजूचायापुगु घटनात जुयाच्वंगु खने दया वःगु दु । नेपाली कांग्रेसं माओवादीया नेता इन्द्र आङ्बोयात मुख्यमन्त्री दयेकेगु धकाः निर्णय यायेवं कांग्रेस दुने आन्तरिक कचवं ब्वलंगु दुसा थुकिं यानाः मुख्यमन्त्री नियुक्तिया प्रक्रिया रोचक मोडय् थ्यं वंगु दु ।
आङ्बों मुख्यमन्त्रीया दावी यायेवं कांग्रेसया हे सांसद केदार कार्कीं कांग्रेसया च्याम्ह व एमालेया ३९ म्ह सांसदया समर्थन थःके दु धासें मुख्यमन्त्री दावी पेश याःगु दु । कार्की कांग्रेस नेता शेखर कोइराला समर्थित सांसद खः ।
थुकथं निम्ह सांसदं मुख्यमन्त्रीया दावी यायेवं आः प्रदेश प्रमुख पर्शुराम खापुङं थौं निम्ह दावेदारतय् समर्थकतय्त थःगु कार्यकक्षय् लाइन तयाः सुयागु मत अप्वः दु धकाः प्रत्यक्ष स्वइगु जूगु दु । वय्कलं थौं सुथय् ८ निसें न्हिनय् २ बजे तक निम्हं दावेदारया समर्थक थःथःगु म्हसीकापौ सहित प्रदेश प्रमुखया कार्यकक्षय् उपस्थित जू वा धकाः सुचं जारी यानादीगु दु । अन सकसिगुं सनाखत यानाः जक मुख्यमन्त्री क्वःछीगु तयारी जूगु दु ।
न्हूम्ह मुख्यमन्त्री नियुक्त यायेत म्हिगः सनिलया ५ बजे तक ई बियातःगु खः । तर प्रदेश प्रमुखं ५ बजे जुइधुंकाः नं मुख्यमन्त्री धाःसा नियुक्त मयाः । वयां लिपा कांग्रेसया च्याम्ह व एमालेया ३९ सांसदया समर्थन दुम्ह केदार कार्की प्रदेश प्रमुखयाथाय् वनाः थःत मुख्यमन्त्री नियुक्त या धकाः माग याः वंगु खः । खापुङं निम्हं सांसदतय्ं थःपिंक ४७÷४७ म्ह हे सांसदया बहुमत दु धकाः दावी याःगुलिं थौं फुकसित लाइन तयाः बहुमत दु मदु स्वयेगु धकाः लिसः बियाछ्वःगु खः ।
सीदु कथं माओवादीया दावेदार आङ्बों थें हे कांग्रेसया दावेदार कार्कीं नं बहुमत दु धकाः दावी यायेवं म्हिगः मुख्यमन्त्री नियुक्तिया ज्या याये मते धकाः प्रदेश प्रमुख खापुङयात केन्द्रपाखें हे दबाब वंगु खः । उकिं वय्कलं थौं तकया ई बिउगु दु । प्रदेश १ या मुख्यमन्त्री माओवादी केन्द्रयात बीगु धकाः निर्णय यायेवं नेपाली कांग्रेस दुने कचवं ब्वलंगु दु । कांग्रेस नेता शेखर कोइराला पुचलं माओवादीयात मुख्यमन्त्री बी फइ मखु धासें एमालेलिसे जानाः कार्कीयात न्ह्यःने हःगु खः ।
कार्कीयात एमालेया फुक्क हे सांसदया समर्थन दु । कांग्रेसं कार्कीयात दावी लित का धकाः निर्देशन बिउसां वय्कः माने जुयाच्वंगु मदु । थ्व बारे सहलह यायेत म्हिगः सःतूगु कांग्रेस कार्यसम्पादन समितिया नं शेखर कोइराला उपस्थित मजुइवं बांलाक न्ह्याये मफुत ।
प्रदेश १ य् गठबन्धनय् ल्वापु पिकायेत लिउने च्वनाः एमालेया अध्यक्ष केपी ओलीं खेल म्हिताच्वंगु खनेदु । तर कार्कीं एमालेया समर्थनय् मुख्यमन्त्री जुइधुंकाः हानं कांग्रेसया हे पक्षय् वनाः धोका बीगु खः लाकि धकाः नं आशंका जुयाच्वंगु दु ।
LEAVE YOUR COMMENTS