महानगर दुने महानगरया ज्याकू तयेत भवन मदु

येँ(नेपालभाषा टाइम्स)÷संघीय राजधानीलिसें देय्या ज्याथःगु स्थानीय सरकारया रुपय् दुगु येँ महानगरपालिकायात महानगर दुने हे थःगु ज्याकूया निंतिं भवन लुइकेत थाकुया च्वंगु दु । महानगरपालिकायात महानगरया दुनेया सहरी लागाय् ज्याकू संचालनया निंतिं भवन लुइकेत तसकं थाकुयाच्वंगु स्थिति खने दयाच्वंगु दु ।

येँ महानगरपालिकाया उपप्रमुखलिसें न्यायिक समितिया संयोजक सुनिता डंगोल नेतृत्वया पुचलं वडा ज्याकूया अवलोकन याःगु इलय् उकथंया समस्या खनेदुगु खः । उपप्रमुख डंगोलया नेतृत्वया पुचलं वडा ज्याकुथिइ उपलब्ध भौतिक संरचनाया स्थलगत अवलोकन याःगु इलय् अज्याःगु अवस्था खने दुगु सीदुगु खः ।

महानगरया दुनेया सहरी लागाय् सरकारी ज्याकूयात भवन बालं बीबलय् म्हो जक बाः वइगु तर, व्यावसायिक प्रयोजनया निंतिं जूसां आपालं बालं वइगु जूगुलिं महानगरया ज्याकू संचालन यायेत भवन लुइकेत हे समस्या जूगु खः।

उपप्रमुख डंगोल नेतृत्वया पुचलं वंगु मंगलवाः येँ महानगरया खुगू वडा १२, १७, १९, २०, २१, व २५य् मेलमिलाप केन्द्र संचालनयात केन्द्रय् तयाः सेवा व ज्याकू व्यवस्थापन पक्षयात ध्यानय् तयाः स्थलगत अवलोकन व निरीक्षण याःगु खः ।

न्हूगु भवन निर्माणया ज्या न्ह्यानाच्वंगुलिं १२ वडाया ज्याकुथिं बालं कयातःगु भवनं सेवा बिया वयाच्वंगु दु । वडा १९ या भवन तसकं चिब्यागु थासय् लाःगुलिं अन न्याम्ह जनप्रतिनिधि व वडा सचिव छकू हे क्वथाय् च्वनाः सेवा बिया वयाच्वंगु दु । २४ वडाय् धाःसा छगू तल्लाय् छकू क्वथापाखें सेवा बिया वयाच्वंगुलिइ आवश्यक थाय् मालेगु जया जुयाच्वंगु दु । थुकथं हे २५ वडा नं बालं कयातःगु भवनय् संचालन जुयाच्वंगु दु ।

उखे १७ वडाया थःगु हे भवन दुसा अन मेलमिलाप केन्द्रया निंतिं बिस्कं कक्ष दु । वडा २१ य् नं न्हूगु भवनं सेवा बिया वयाच्वंगु दुसा थन नं बिस्कं मेलमिलाप कक्ष दु ।

उपप्रमुख डंगोल नेतृत्वया पुचलं आतक ३१ गू वडाया वस्तुगत अवस्था व भौतिक संरचनायात कयाः अवलोकन यायेधुंकूगु दु । गुलिखे वडाया थःगु हे सुविधा सम्पन्न भवन दुसां बिस्कं मेलमिलाप कक्ष संचालन यायेगु थाय् धाःसा मदु ।