न्हू सतकय् हानं प्रतिरोध
येँ (नेपालभाषा टाइम्स)÷थनया न्हू सतक चिब्या याः वःपिं येँ मनपाया नगर प्रहरीयात म्हिगः नं स्थानीयवासीं प्रतिरोध यात । म्हिगः सुथय् ७ बजे हे १५० म्ह नगर प्रहरीया शक्ति सहित न्हू सतकय् लँ चिब्या यायेत स्वःगु खःसा स्थानीयवासीं प्रतिरोध यायेवं उपिं ज्या मयासे लिहां वंगु खः ।
लँ चिब्या यायेगु ज्यायात सडक विभागं समेत पना तःगु खःसा मनपाया मेयर बालेन साहं विभागया निर्देशनयात समेत वेवास्ता यासें लँ स्यंकेत स्वःगु खः । मनपां म्हिगः चान्हय् नं अन लँ स्यंकेगु कुतः याःगु खः । तर स्थानीय आन्दोलनकारीतय्सं चान्हय् १२ बजे मनपां ज्वना वःगु सामान कब्जा यानाः उमित लित छ्वया बिउगु खः ।
म्हिगः जूगु आन्दोलनय् येँ मनपा २२ वडाया वडाध्यक्ष चिनीकाजी महर्जन, २३ वडाया अध्यक्ष मचाराजा महर्जन, २१ वडाया अध्यक्ष उदय चुडामणि वज्राचार्य व १८ वडाया अध्यक्ष न्हुछेकाजी महर्जनपिंसं नं ब्वति काःगु खः । सतक चिब्या याःगु लागाय् लाःगु येँ २४ वडाया अध्यक्ष विनोद राजभण्डारी धाःसा प्रतिरोधय् कुहां मवयेवं आन्दोलनकारीतय्सं २४ वडाया ज्याकुथिइ हे वनाः धर्ना बिउगु खः । तर वडा अध्यक्ष राजभण्डारी धाःसा सम्पर्कय् मवः । वयां लिपा उमिसं बालेन साह मुर्दावाद, २४ वडाया अध्यक्ष मुर्दावाद धकाः नारा थ्वयेकाः न्हू सतक लागा चाःहिउगु खः ।
न्हू सतकय् लँ चिब्या यायेत्यंगु व उकियात कयाः विरोध जुयाच्वंगु बारे म्हीग उगु लागाया वडा अध्यक्षतय्त येँ मनपाया प्रमुख प्रशासकीय अधिकृत प्रदिप परियारं सःतूगु खः । परियारं फुक्क खँ न्यनेधुंकाः मेयरयात थुकिया बारे जाहेर यायेगु बचं बिउगु खःसा मेयर साहं वय्कःया खँ समेत मन्यंगु खँ धाःगु दु ।
थ्वहे झ्वलय् येँया सडक विभागं थःपिंसं बियागु आदेशयात वेवास्ता यासें सतक स्यंकूगु द्वपनय् आः मेयर बालेन साहयात कानुनी दण्ड बीगु तयारी यानाच्वंगु खँ सीदुगु दु । सतक स्यंकल धाःसा जिल्ला अदालतं थें हे दण्ड बीगु अधिकार सडक विभागयात कानुनं बियातःगु दु ।
LEAVE YOUR COMMENTS