खुगू उद्योगय् मतया लाइन स्वाइगु

येँ (नेपालभाषा टाइम्स)- नेपाल विद्युत प्राधिकरणं डेडिकेट व टं«क लाइनया ध्यबा मपूगुलिं लाइन चानातःगु खुगू उद्योगय् हाकनं लाइन स्वाना बीगु जूगु दु । प्राधिकरणया म्हिगः च्वंगु बैठकं खुगू उद्योगय् लाइन स्वायेगु निर्णय याःगु खः । थ्वयां न्ह्यः प्रधानमन्त्री केपी ओलीं थुपिं उद्योगया लाइन तुरुन्त स्वाना बीत निर्देशन बिउगु खःसां प्राधिकरणया अध्यक्ष कुलमान घिसिङं जलस्रोत मन्त्रालयपाखें पौ मवयेकं लाइन स्वाये फइमखु धकाः प्रधानमन्त्रीया निर्देशनयात हे बेवास्ता यानाच्वंगु खः ।

म्हिगः च्वंगु बोर्ड बैठकं स्वलाया दुने ध्यबा पुलेमाःगु सर्तय् लाइन स्वायेगु व स्वला दुने ध्यबा मपुल धाःसा हाकनं लाइन चायेगु निर्णय याःगु खः । तर थ्व निर्णयय् नं बोर्डया निम्ह दुजःपिंसं असहमति प्वंकूगु खँ धाःगु दु ।

बोर्डया दुजःपिं कपिल आचार्य व भक्तबहादुर पुनं बक्यौता उठे मयायेकं लाइन स्वाये हे मजिउगु अडान काःगु खँ धाःगु दु । वय्कःपिंसं मन्त्रिपरिषद्या निर्णय कथं लाइन चाःगु जूगुलिं मन्त्रिपरिषदं हे लाइन स्वायेगु निर्णय याना महयेकं लाइन स्वाये मजिउगु अडान काःगु खः । तर बहुमतया आधारय् खुगू उद्योगया लाइन स्वायेगु निर्णय जूगु खँ धाःगु दु ।

प्राधिकरणं वंगु असार २५ गते रिलायन्स स्पिनिङ मिल, घोराही सिमेन्ट, अर्घाखाँची सिमेन्ट, जगदम्बा स्टिल, जगदम्बा सेन्थेटिक व हुलास स्टिलया लाइन चानाबिउगु खः ।