जहाज दुने हे यात्रुया मृत्यु
रारा (रासस)- रारा विमानस्थलं नेपालगञ्जया निंतिं ब्वयावंगु तारा एअरया छगः ट्वीनटर जहाजय् च्वनावंम्ह छम्ह यात्रु जहाज दुने हे सीगु दु ।शनिवाः न्हिनय् १२ः३० बजे रारा विमानस्थलपाखें नेपालगञ्जया निंतिं ब्वयावंगु तारा एयरलाइन्सया ९ एन एइटी कलसाइनडा उडान नं. ७१६ विमानय् मुगु जिल्ला सोरु गाउँपालिका ८ गिलाहाँ गामय्च्वनीम्ह ३८ दँया धिरबहादुर शाही विमान दुने हे सीगु खँ स्थानीयतय्सं धाःगु दु ।
मेखे तारा एयरया नेपालगञ्ज स्टेशन म्यानेजर सूर्यमणि सुवेदीं धाःसा यात्रु जहाज दुने बेहोस जूगु व उपचारया निंतिं गाडीं अस्पताल यंकाच्वंगु इलय् सीगु खँ धाःगु दु । रारा विमानस्थलया तारा एअरया स्टेशन इञ्चार्ज शेरबहादुर भामं विरामीयात प्राथमिकता बीगु प्रावधान कथं मदुम्ह शाहीया छेँजःपिंत विरामी यंकेगु मञ्जुरीपत्रय् सही याकाः तारा एयरया उडानय् छ्वयागु खँ धाःगु दु ।
मदुम्हेसिया दाजु नन्दबहादुर शाहीं किजायात जहाजय् तयाः जहाज ब्वयेधुंकाः थः लिहां वनाच्वनाबलय् लँय् हे तारा एयरया निम्ह कर्मचारी व निम्ह प्रहरी वयाः छ नेपालगञ्ज वनेमाल धकाः हाकनं रारा विमानस्थलय् यंकाः भ्वं याकूगु खँ धाःगु दु ।
शव परीक्षणया निंतिं भेरी अस्पतालय् सीम्ह यंकूसां आफन्ततय्सं यात्रु बीमा मजूतले सीम्ह बुझे यायेमखु धयाच्वंगु दु । रारा नागरिक उड्डयन कार्यालय मुगुया विमानस्थल प्रमुख सूर्य शर्मा विरामी अचेत जुइवं राँझा विमानस्थलय् जहाज अवतरण यायेवं विरामीयात अस्पतालपाखे यंकूगु खँ थःत जानकारी वःगु व विरामीया थःथितिं विरामी उडान सहमतिपत्रय् दस्तखत यानातःगु दुगु खँ धयादीगु दु ।
तारा एयरया उडानय् सीम्ह शाही लिसें झिंस्वम्ह यात्रु दुगु खः । थःथितिपिंसं विरामी जहाज दुने सीगु खँ धाःसां तारा एयरं धाःसा विमानस्थलं अस्पतालपाखे यंकाच्वंगु इलय् सीगु दावी यानाच्वंगु दु । विरामी मञ्जुरी पत्रय् सहमति मयासे यात्राय् वनाच्वंगु इलय् सुं यात्रु जहाज दुने सीत धाःसा उडान याःगु कम्पनीं यात्रुया बीमा व क्षतिपूर्ति बीमाःगु प्रावधान दु ।
LEAVE YOUR COMMENTS