सत्यमोहन जोशीया नामं छगू कराेडया कोष घोषणा

येँ – वाङमय शताब्दी पुरुष सत्यमोहन जोशीया सछिदँ बुन्हिया लसताय् ‘वाङमय शताब्दीपुरुष सत्यमोहन जोशी कोष’ घोषणा जूगु दु । म्हिगः मंगलवाः नेपाः बैक्वेटय् ग्वसाः ग्वःगु छगू ज्याझ्वःया दथुइ कोषया घोषणा जूगु खः ।
म्होति नं १ करोड तका खाकेगु तयारी सहित घोषणा जूगु कोषय् म्हिगः हे येँ महानगरपालिकापाखें न्यागू लाख तका व मेमेगु स्रोतं मुंगु १० लाख यानाः १५ लाख तका मुनेधुंकूगु दु ।

तिथि कथं म्हिगः बछलाथ्व नवमीकुन्हु वय्कः सछिदँँ क्यंगु लसताय् जूगु ज्याझ्वलय् कोषया घोषणा यासें कोषया संयोजक लक्ष्मीदास मानन्धरं वय्कःयात भिंतुना देछाया दीगु खः । कोषया मेपिं दुजलय् मल्ल के. सुन्दर, माननीय भिमसेनदास प्रधान, माननीय कृष्णगोपाल श्रेष्ठ, पूर्वराज्यमन्त्री तीर्थराम डंगोल, प्रा. प्रेमशान्ति तुलाधर, डा. रीना बानिया तुलाधर, प्रेमहिरा तुलाधर, नवीन मानन्धर, कृष्ण अर्याल, उमेश स्थापित, सुजीव वज्राचार्य व सुरेश किरण मानन्धर च्वनादीगु दु ।

मस्तय्त थःगु मांभाय् व संस्कृति प्रति नुगः क्वसायेके बीगु निंतिं थीथी ज्या यायेगु थुगु कोषया
मू उद्देश्य जुइ । कोषं न्हापांगु ज्या कथं नेवाः भासं क्वाःकासाया न्ह्यइपुगु श्रव्यदृश्यसहितया पाठ्यसामग्री दयेकेगु योजना हःगु दु । लोकंह्वाःपिं कलाकारपिं मदनकृष्ण श्रेष्ठ व हरिवंश आचार्यं थःपिं हे सहभागी जुयाः पाठ्यसामग्री दयेकीगु खँया नं जानकारी बिउगु खः ।

सम्बन्धित बुखँ

LEAVE YOUR COMMENTS