‘पार्किङ चीके माल धकाः न्यूरोडया जनतां धाःगु मदु’

येँ महानगरपालिकां २२ वडाया न्हू सतक लागाया सतकय् गाडी व मोटरसाइकल पार्किङ चीका छ्वयेवं उगु वडाया वडा अध्यक्ष चिनीकाजी महर्जन थःगु हे महानगरपालिकाया मेयर बालेन साह विरुद्ध सतकय् कुहां वःगु दु । थ्व मुद्दां यानाः वडा अध्यक्ष महर्जन थौंकन्हय् मेयर साह विरुद्ध दं वःम्ह प्रमुख प्रतिपक्षी नेता थें खने दयेकः वःगु दु । थ्वहे सन्दर्भलिसे स्वानाः वय्कःलिसे जूगु बःचाधंगु खँल्हाबल्हा–

मेयर साह विरुद्ध ला छि खुले जुयाः कुहां वयादिल । पार्किङ हे जक थुकिया कारण खः ला ?
– वय्कःयात बांलाःगु ज्याय् जिमिसं साथ बियाच्वनागु हे खः । बी नं माः । गुलिखे थासय् वय्कलं डोजर चले याःबलय् जि नापनापं वनाबियागु दु । तर न्हूसतकय् पार्किङ चीकेगु सवालय् धाःसा वय्कःलिसे खँ मिले मजुल । उकिं विरोध याये माल ।

पार्किङ चीकेगु सवालय् छिलिसे नं सल्लाह जूगु दु धइगु खँ पिहां वयाच्वन । सल्लाह जूगु दु ला ?
– सल्लाह जूगु मखु । जि छगू मेगु हे ज्याय् वय्कःयात नापलायेत वनाबलय् वय्कलं न्यूरोडया सशुल्क पार्किङया ठेक्काया म्याद क्वचायेत्यंगु दु । आः रिन्यु याये मखुत धयादिल । न्यूरोडय् सशुल्क पार्किङ तये मजिउ धइगु पक्षय् जि न्हापांनिसें दु । पुलांम्ह मेयर भाजुं थ्व सशुल्क पार्किङया ठेक्का बिउबलय् जिं उकिया विरोध यानागु खः । जिगु हे वडाय् अबलय् थ्व पार्किङया उद्घाटन जूबलय् जि अन उपस्थित मजुया । वास्तवय् सशुल्क पार्किङं स्थानीय जनतायात तकं दुःख बियाच्वंगु खः । उकिं थन सशुल्क पार्किङ हटे यानाः निःशुल्क व व्यवस्थित पार्किङ यायेमाः धइगु बिचाः खः । पार्किङ सशुल्क जुइ मजिउ धइगु जक जिगु बिचाः खः, पार्किङ हे तये मजिउ धकाः जिं धयागु मदु, मेयरं जिके न्यंगु नं मदु ।

मेयरं पार्किङ चीकाः ला न्यूरोडया पुनर्जन्म हे जुल धकाः नं प्रचार यानाच्वन । छितः अथे मताः ला ?
– स्वयादिसँ, न्यूरोडय् द्यनीपिं ला जिपिं खः, म्हगस कर्पिन्सं खंकां जिउ ला ? न्यूरोडय् छु याये जिउ, छु याये मजिउ धइगु खँ दकलय् अप्वः सिउपिं ला न्यूरोडवासी हे खः नि । कर्पिन्सं स्यं वयेमाः ला ? न्यूरोडया पार्किङं मनूतय्त दुःख जुल धकाः प्रचार यात । सु मनूयात दुःख जुल ? सु न्यूरोडवासीं पार्किङया कारणं जिमित दुःख जुल धकाः रिपोर्ट बिउगु दु ? सु न्यूरोडवासीं पार्किङ चीके माल धाः वंगु दु ? न्यूरोडवासीं ला सशुल्क पार्किङवालातय्सं दुःख बिल उकिं निःशुल्क जुइ माल जकं धयाच्वंगु दु का । न्यूरोडय् छुं ज्या यायेत न्यूरोडवासीया खँ न्यनेगु लाकि पिने च्वंपिं मनूतय्सं धाःगु खँ न्यनेगु ?

न्यूरोडय् छिं धाः थें निःशुल्क पार्किङ याये फइ ला ? झन् भद्रगोल मजुइ ला ?
– जुइ मखु । नगरपालिकाय् उलिमछि नगर प्रहरीत दु, उमित लगे यानाः व्यवस्थित यायेगु खः । महानगरयाके बजेट द हे दु, जनताया सुविधाया लागिं बजेट खर्च यायेत छाय् नुगः स्याकेगु ? नगरपालिकां जनतायाके कर उठे यानाः दयेकीगु बजेटया ४० प्रतिशत दां हे खर्च याये मफु । व बजेट निःशुल्क पार्किङय् खर्च याये माल । थ्व २२ वडां जक महानगरयात दँय् १६–१७ करोड राजश्व मुंकाः बीगु यानाच्वंगु दु । राजश्व अप्वः उठे याइगु वडायात सुविधा नं भचा बी माल नि, अःखतं दण्ड जकं बिल ।

मेयरं ला धरहराय् पार्किङ याये जिउ धकाः नं विकल्प बियाच्वंगु दु । थ्व पार्किङ बारे छिगु छु बिचाः दु ?
– दकलय् न्हापां ला आः तक धरहराया पार्किङ तयार हे मजूनि । धरहराय् पार्किङ याकेमाः धइगु खँय् जिपिं स्पष्ट दु । वंगु मोहनि व स्वन्तिया इलय् जिमिसं मन्त्रालय व अनया ठेकेदारयात इनाप यानाः पार्किङ यानागु हे खः । उकिया लागिं माःगु पूर्वाधार नं जिमिसं तयागु खः । तर छम्ह वडा अध्यक्षं यायेफुगु ति ज्या तकं थौं मेयरं याये मफु । वहे कारणं अन मन्त्रालयलिसे विवाद जुयाच्वंगु दु ।

न्यूरोडय् पार्किङया ठेकेदार छिगु पार्टीया कार्यकर्ता जूगुलिं छिकपिंसं विरोध यानाच्वंगु धकाः नं खँ वल, थ्व छु खः ?
– थ्व गलत खः । पुलांम्ह मेयरया पालय् थ्व ठेक्का बीगु ज्या जूगु खः । जिं न्हाचः नं धाये धुन, अबलय् नं जिं उकिया विरोध हे यानागु खः । जिगु धापू पार्किङ धइगु ठेक्कां बी हे मते । ठेकेदार हटे यानाः निःशुल्क पार्किङ याके माल, नगर प्रहरीं उकिया व्यवस्थापन याये माल । जिं ठेकेदार हटे याःगुया विरोध यानागु मखु, पार्किङ हटे याःगुया विरोध यानागु खः । जिं ला आः नं धयाच्वना, पुलांगु नगर पञ्चायत भवन स्यंकाः आः अन गुगु कल्चर हाउस दयेकेत्यंगु खः उकियात रद्द यानाः व भवनयात नेवाः कलात्मकतां जाःगु पार्किङ भवन दयेकेमाल । अथे हे थौंकन्हय् नेपाल वायुसेवा निगम तयातःगु छेँ नं न्हापा खुल्ला थाय् खः । व भवनयात नं आः पार्किङ भवन दयेकेमाल । बजार विकास यायेगु खःसा सुविधा नं बीमाल ।

मेयर बालेन साहया ज्या विरुद्ध छि थुगुसी कडा रुपं हे पिहां वयादिल । न्हापा न्हापा ला बालेन साहं गलत ज्या याःसां छिकपिं मौन च्वनादी धइगु धापू दु ।
– वय्कलं यानादीगु बांलाःगु ज्यायात समर्थन यायेगु खः, गलत ज्यायात विरोध यायेगु खः । वय्कलं शंखमुलय् लिउने च्वंपिं मनूतय्त लँ तबाला याये माल धकाः निजी जग्गाय् डोजर नकल, उकिया विरुद्ध जि सतकय् कुहां वयागु खः । उकी मेयर लिचिले माल । येँया थाय्मरु त्वालय् स्थानीय जनताया त्वाःछेँय् डोजर चले यात, उकिया विरुद्ध नं जि आन्दोलनय् कुहां हे वयागु खः । उकी नं मेयर लिचिले माल । आः नं पार्किङ चीकाः गलत ज्या याःगु खः, विरोधय् कुहां वयागु दु ।

छिकपिनि थ्व विरोधया ज्यायात मेमेगु वडापाखें गुलि समर्थन वःगु दु ?
– वय्कःपिनिगु नं समर्थन दु । आः बुलुहुँ नापं च्वनाः मंकाः रुपं विरोध यायेगु खँ जुयाच्वंगु दु । बागबजारय् पार्किङ हटे याःबलय् अनया बजाः ४० प्रतिशत सुना वंगु व सछिगू पसः बन्द यानाः त्वःता वंगु धइगु खँ न्यनागु दु । दरवारमार्गया नं बजाः हे सुना वंगु दु । असं, भोताहिति, मखं, न्यूरोडया बजाः धइगु थवंथवय् स्वापू दुगु बजाःत खः । छथाय् सुना वन धाःसा मेथाय् उकिया लिच्वः लाः वनी ।

आः बालेन साहं पार्किङ तयेके हे मबिल धाःसा छिकपिंसं छु यानादी ?
– जनताया खँ न्यनीम्ह जनप्रतिनिधि खःसा वय्कलं पार्किङ तयेके हे बीमाः । थ्व न्यूरोडवासी जनताया माग खः । थुकिया लागिं थन संघर्ष समिति हे गठन यानाः जनता सतकय् कुहां वयाच्वंगु दु । आः संघर्षया पलाः न्ह्याना वनी । पार्किङ हटे याःगु विरुद्ध फुक्क हे पार्टी छप्पँ दु, फुक्क हे सामाजिक संघ संस्थात नं छप्पँ दु । वय्कः येँ देय्या हित यायेत वःम्ह खः लाकि मखु धकाः नं थुकिं हे टेस्ट जुइ । थौंकन्हय् वय्कःया समर्थकतय्सं येँ देय्यात बालेन सिटी धकाः प्रचार यानाच्वंगु दु । अथे धाइपिंत रोके यायेमाःम्ह मेयर ला बालेन सिटी धाइबलय् मुसुमुसु न्हिलाच्वंगु खना । नीन्यासःदँ पुलांगु थ्व शहरया नां गज्याःगज्याःपिं राजा महाराजातय्सं ला हिले मफु धाःसा आः हिलेगु दुःस्वप्न मखंसां जिउ । थ्व शहरया नां येँ देय् खः, काठमाडौं खः, बालेन सिटी मखु ।

न्ह्यब्वःम्ह ः सुरेश

सम्बन्धित बुखँ

LEAVE YOUR COMMENTS