ने. सं. ११४४ कौलाथ्व पारू - नःलास्वनेगु

थ्रीस्टार त्यात, च्यासल व पुलिस बराबरीइ

येँ – शहीद स्मारक ए डिभिजन लिग अन्तर्गत बुधवाः जूगु कासाय् थ्रीस्टारं बिग्रेड ब्वाइजयात बुकूगु दु । दशरथ रंगशालाय् जूगु न्हापांगु कासाय् थ्रीस्टारं ब्रिगेडयात ३–१ गोलं बुकूगु खः । थ्रीस्टारया विजयया निंतिं सुशान्त श्रेष्ठ, अनन्त तामाङ व वासिउ ओलादिरान आजमातं छगू छगू गोल याःगु खः ।

कासाया १५ औं मिनेटय् सुशान्तं गोल यासें थ्रीस्टारयात अग्रता बिउगु खः । अशोक खवासया पासय् बक्सदुनें प्रहार यासें सुशान्तं न्हापांगु गोल याःगु खः । कासाया ४१ औं मिनेटय् अनन्तं मेगु गोल यायेवं थ्रीस्टारं न्हापांगु हाफय् २–०या अग्रता काःगु खः । अनन्तं मिक्चेन तामाङया कर्नरय् हेड यासें गोल याःगु खः । कासाया ५८ औं मिनेटय् थ्रीस्टारया निंतिं हाजमातं थप छगू गोल यानाबिउगु खः । ब्रिगेडया निंतिं कासाया ८९ औं मिनेटय् रोशन रानामगरं छगू जक सान्त्वना गोला याःगु खः । थ्व विजय लिपा थ्रीस्टार १० अंक कयाः ल्याः धलखय् न्यागूगु थासय् थ्यंगु दु ।

मेखे पुलांम्ह राष्ट्रिय कासामि सन्तोष साहुखलं नं लिगय् थःगु व्यक्तिगत सछिगू गोल पूवंकूगु च्यासल युवा क्लब व पुलिस क्लबया कासा धाःसा २–२ गोलया बराबरीइ क्वचाःगु दु । रंगशालाय् जूगु कासाय् पुलिस क्लबया निंतिं कासाया न्यागू मिनेटय् हे निरकुमार राईं न्हापांगु गोल यानाबिउगु खः । थ्व लिपा कासाया १८ औं मिनेटय् सन्तोष साहुखलः नं गोल यासें कासा बराबरीइ हल । सन्तोष थ्व गोल वयागु लिगय् व्यक्तिगत सछिगूगु गोल खः । थ्व लिपा ४० औं मिनेटय् सुमन लामां पुलिसया निंतिं मेगु गोल यात । न्हापांगु हाफय् २–१ गोलया ल्याखं लिउने लाःगु च्यासलयात बराबरीइ हयेगु निंतिं सन्तोषं हे मेगु गोल याःगु खः ।

कासाया निगूगु हाफ सुरु जूगु प्यंगू मिनेट दुने हे सन्तोषं बराबरीया गोल याःगु खः । हेमन्त थापां बिउगु क्रसय् हुलमुलया दथुइ सन्तोषं थ्व गोल याःगु खः । थ्व लिपा नं सन्तोषयात मेगु तःगू ह्वःताः चूलाःगु खःसां ह्याट्रिक यायेत धाःसा असफल जुल ।