बौद्ध विहार संघया स्वर्णजयन्ती शुरु

यल(नेपालभाषा टाइम्स)- बौद्ध विहार संघ यलया स्वर्ण जयन्ती औपचारिक रुपं शुरु जूगु दु । थनया अक्षेश्वर महाविहारय् जूगु संघया ४९ क्वःगु वार्षिकोत्सवलिसें स्वर्ण जयन्ती नं औपचारक रुपं शुरु जूगु खः ।

प्रधानमन्त्री केपी शर्मा ओलीं संघया ४९ क्वःगु वार्षिकोत्सव व स्वर्ण जयन्ती महोत्सवया औपचारिक रुपं शुभारम्भ यानादीगु खः । ज्याझ्वलय् नवासें प्रम ओलीं धर्मया नामय् जुइगु राजनीतियात निषेध यायेमाःगु खँय् बः बियादिल ।

‘धर्म निरपेक्ष झीगु देशय् सकसितं स्वतन्त्रतापूर्वक थःथःगु आस्थाकथं धर्मय् लगे जुइगु अधिकार दु’, प्रम ओलीं धयादिल, ‘तर धर्मया नामय् राजनीति यायेगु व थुकियात राजनीतिया रुपय् स्वीकार धाःसा याये फइमखु ।’

न्यादँ न्ह्यः भियतनामय् जूगु अन्तर्राष्ट्रिय बौद्ध सम्मेलनय् थम्हं ब्वति कयागु व उगु इलय् संयुक्त राष्ट्र संघया ग्वसालय् नेपालय् नं सम्मेलन यानागु खँ न्ह्यथनागु खःसां उगु इल्य् कोरोना महामारीया कारणं लिच्वः लाकूगु वय्कलं धयादिल । लिसें वय्कलं बुद्ध जन्मस्थल लुम्बिनीइ न्याद्वःम्हेसिनं ध्यान याये फइगु क्षमतया अन्तर्राष्ट्रिय ध्यान केन्द्र निर्माण याकागु नं न्ह्यथनादिल ।

विगतय् नेपाः व भारतय् बौद्ध धर्म, बुद्धया दर्शन, विचाः विस्तार व प्रवद्र्धन यायेगु ज्या कट्टरवादीतय् कारणं सहज व सम्भव मजूगु खःसां आः अज्याःगु अवस्था मदुगु व थौंया इलय् बुद्धया विचाः विश्वन्यंकं प्रचार जुयाच्वंगु स्पष्ट यानादिल ।

बुद्ध धर्म व वसपोलया विचाःयात राजनीतिया निंतिं दुरुपयोग याये मजिउगु खँय् विशेष रुपं बः बियादिसें प्रम ओलीं धयादिल, ‘बुद्धया दर्शन व बौद्ध शिक्षा हे अहिंसा व मावनताया निंतिं खः धासें सुं नं जीवया हिंसा याये मजिउ धइगु हे बुद्धवादया सार खः ।’

उगु इलय् प्रम ओलीं बुद्ध शिक्षा, बौद्ध दर्शन प्रचार प्रसार, प्रवद्र्धनय् योगदान बियादीम्ह बौद्ध विद्वान दुण्डबहादुर वज्राचार्य व लोट्स रिसर्च सेन्टरयात हनेज्या नं यानादीगु खः ।