सापारू तयारी – दमकल व एम्बुलेन्स स्टाय्ण्डबाइ

येँ (नेपालभाषा टाइम्स)- शुक्रवाः येँय् पिकाइगु सायाःयात व्यवस्थित यायेत थीथी खलः, पुचः, क्लब व निकायतय्सं आवश्यक तयारी याना हःगु दु । थ्व सायाःबलय् हनुमानध्वाखाय् दथुदथुइ वयाः फ्वं वइपिं मनूतय्त चीकेगु लागिं विशेष रुपं पहल याइगु खँ धाःगु दु । थुकिया लागिं मनपाया नगर प्रहरीयात जिम्मा बिउगु दु । अथे फ्वं वइपिं मनूत थौंकन्हय् पुचः हे मुनाः वइगु जूगुलिं उमिसं यानाः सायाः वइपिं व दान बीपिंत समस्या जुयाच्वंगु दु ।

अथे हे थुगुसी सापारु कुन्हु हे गनं छुं समस्या जुयाः दमकल व एम्बुलेन्स हनुमानध्वाखा जुयाः हे ब्वाके माःगु अवस्था जुल धाःसा समस्या जुइ धकाः लः जाःगु दमकल छगः व एम्बुलेन्स छगः परोपकार स्कुल लागाय् स्टाय्ण्डबाइ तया तयेगु निर्णय जूगु दु । उकुन्हु हनुमानध्वाखायय् थीथी निकाय, क्लब व खलः पुचःतय् दथुइ जूगु बैठकय् २० वडाया अध्यक्ष राजेन्द्र मानन्धरया प्रस्ताव कथं दमकल व एम्बुलेन्स तकं स्टाय्ण्डबाइ तयेत्यंगु खः ।

बैठकय् दुथ्याःम्ह सम्पदा अभियन्ता गणपतिलाल श्रेष्ठं ‘नेपालभाषा टाइम्स’ यात कनादीकथं थनिं निदँ न्ह्यः सापारु कुन्हु हे छावनीइ छेँ मिं नयाः दमकल ब्वाके माःबलय् हनुमानध्वाखां वनेत तसकं थाकुगु खः ।

सापारु कुन्हु अनया अन हे यचुपिचु याइपिं, भिड नियन्त्रण याइपिं, लः व वासःया व्यवस्था याइपिं नं खटे याःगु दु । येँ मनपां सायाः रुटय् स्यंगु लँ नं दयेकेगु शुरु याना हःगु दु ।