‘पुलांगु मतभेद ल्वःमंकाः गठबन्धन सहित चुनावय् वने’

येँ (नेपालभाषा टाइम्स)- न्यागू दलीय सत्ता गठबन्धनं वइगु स्थानीय निर्वाचनय् तालमेल यायेगु सहमति यासें थवंथवय् सहकार्य व ग्वाहालिया भावना तयाः न्ह्याःवनेत कार्यकर्तातय्त अपिल याःगु दु ।

म्हिगः प्रधानमन्त्री निवास बालुवाटारय् च्वंगु गठबन्धनया बैठक लिपा कांग्रेस सभापति लिसें प्रधानमन्त्री शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल, नेकपा एकीकृत समाजवादीया नेता झलनाथ खनाल, जनता समाजवादी पार्टीया नेता अशोक राई व राष्ट्रिय जनमोर्चाया उपाध्यक्ष दुर्गा पौडेलं मंकाः रुपं अपिल जारी यासें चुनावय् छम्हं मेम्हेसित निरन्तर ग्वाहालि यायेत व मतभेद चीकेत इनाप याःगु खः ।

म्हिगः याःगु मंकाः अपिलय् धयातःगु दु, ‘लोकतन्त्रया तब्यागु लँय् नेपाःमि जनतायात स्वतन्त्रतापूर्वक न्ह्यःने यंकेत व समाजय् न्याय व समानता कायम यानाः प्रतिगमनयात परास्त यासें नेपाःया सर्वाङ्गिण व अग्रगामी विकास लिसें समृद्धि हासिल यायेत न्यागू दल प्रतिबद्ध दु, म्हिगःया आपसी मतभेदयात चीकाः चुनावय् छम्हं मेम्हेसित निरन्तर ग्वाहालि यायेगु प्रण याना, उकिया नितिं देय्न्यंकं थाय् व अवस्था कथं चुनावी तालमेल यानाः आपसी सहकार्य व परस्पर ग्वाहालिया भावना तयाः चुनावय् न्ह्याः वनेत न्यागू दलया फुक्कं पासापिंत आह्वान यानाच्वना ।’

उकथं हे अपिलय् न्यागू दलं न्हू संविधान जारी यायेधुंकाः देय् न्हूगु युगय् दुहां वनेधुंकूगु व अज्याःगु हिउपाः मयःपिं शक्तितय्सं षडयन्त्र यानाच्वंगु द्वपं बिसें धयातःगु दु, ‘न्हूगु संविधान जारी जुइधुंकाः देय् समावेशिता, गणतन्त्र व स्थायित्वया दिशाय् न्ह्याः वनाच्वंगु दु, तर नं हिउपाःयात आत्मसात याये मफुपिं गुलिखे शक्तितय्सं थुगु हिउपाःया विरुद्ध अझ नं षडयन्त्र यानाच्वंगु दु धइगु खँया दसु संविधानयात उल्लंघन यासें संसदय् निरन्तर प्रहार, अदालत उपर खेलवाड व संवैधानिक अंगय् ब्वलंकूगु बेथितिं स्पष्ट यानाच्वंगु दु, थ्व धइगु आःया लोकतान्त्रिक हिउपाःयात उल्टे यायेगु दुष्प्रयास खः ।’

उकथं हे हिउपाः विरोधी व प्रतिगामी दुराशयपाखें देय् व लोकतन्त्रयात बचे याना तयेत न्यागू दलीय गठबन्धनयात निरन्तरता बीमाःगु खँ धासें अपिलय् धयातःगु दु, ‘देय् व लोकतन्त्र बचे याना तयेत न्यागू दलीय गठबन्धन जूगु खः, न्यागू दलया थुगु ऐक्यबद्धतां नेपालय् लोकतन्त्र व लोकतन्त्रया मूल्यय् आधारित समाजवादया रक्षा यासें नेपाःया राष्ट्रिय स्वाधिनता, नेपाःमि जनताया स्वतन्त्रता व उन्नतिया निंतिं स्थानीय वासिन्दाया समस्यात चीकाः स्थानीय निर्वाचनय् नं तालमेल यानाः न्ह्यःने वनेगु घोषणा याना ।’