थौं बुंगद्यःयात देगलं पितबिज्याकीगु

यल– बुंगद्यःयात थौं विधिपूर्वक देगलं पितबिज्याकीगु जूगु दु । बुंगद्यःया जात्राय् यायेमाःगु विधि कथं थौं बुंगद्यःयात तःबहालय् च्वंगु देगलं पितबिज्याकाः रथय् बिज्याकेमाःगु खः । तर कारोना भाइरसया संक्रमणया ग्याःचिकुया कारणं थुगुसी रथ दयेके मफुगुलिं रथय् बिज्याकीगु ज्या धाःसा मजुइगु जूगु दु । अथे खःसां द्यःया विधि पूवंक माःगुलिं थौं द्यःयात देगलं पित बिज्याकाः तःबहालय् दुने हे च्वंगु भजन फल्चाय् बिज्याकी जूगु दु ।

बुंगद्यःया पांजु अमरराज शाक्यं कनादीकथं द्यःयात रथय् तयेत यंकीबलय् पिहां वनीगु तःबहाःया लिउनेया लुखा लिक्कसं लाःगु भजन फल्चाय् बुंगःद्यःयात बिज्याकी ।

थौं सनिलय् बुंगद्यःयात जीव तयेधुंकाः विधिपूर्वक हे देगलं पितबिज्याकाः फल्चाय् बिज्याकेगु खँ वय्कलं कनादीगु दु । बुंगद्यःयात जीवन्यास यायेगु निंतिं क्वदुवालय् द्यः काः वनाच्वंपिं थौं न्हिनय् ३–४ बजे पाखे तबहालय् थ्यनीगु खँ वय्कलं धयादीगु दु । क्वदुवालं हःगु कलश थ्यनेधुनेवं विधिपूर्वक द्यःपुज्यानाः जीवन्यास यायेगु ज्या जुइ ।

किवंदन्ती कथं बुंगद्यःयात कामारुकामाक्षं स्वनिगलय् दुत हःबलय् बुंगद्यःया मां यक्षणी नं लिना हःगुलिं क्वदुवालय् थ्यंकाः गुरुजुं मन्त्रसिद्धिं बुंगद्यःयात भम्बः दयेकाः कलशय् स्वथनाः कलशयात ज्यापुया म्ह्याय्मचाया जनिखय् सुचुकाः नगरय् दुत हःगु धाइ । थ्व किवंदन्ती कथं दँय्दसं बुंगद्यःया जात्रा याये न्ह्यः क्वदुवालय् वनाः बुंगद्यःयात काःवनेगु परम्परा न्ह्याना वयाच्वंगु दु ।

थौं बुंगद्यःयात देगलं पित बिज्याकूसां द्यःजात्रा धाःसा छु यायेगु धयागु खँय् अझं क्वःछीमफुनिगु खँ पांजु शाक्यं धयादीगु दु । बुंगद्यःयात देगलं पितबिज्याकीगु जूगुलिं थौं हे द्यःपाः च्वनेगु पाः धाःसा हिलीगु जूगु दु । थौं तक देगलय् पाः च्वनादीम्ह अमरराज शाक्यया थासय् आः रथय् पाः लाःपिं पांजुपिंसं फल्चाय् तयातःम्ह बुंगद्यःया बिचाः याइगु जूगु दु । थुगुसी रथय् पाः पांजुपिं हेम वज्राचार्य व पूर्ण शाक्यया लानाच्वंगु दु ।