ने. सं. ११४३ चौलाथ्व सप्तमी -

वइगु अष्टमी व नवमीकुन्हु नेपालभाषा साहित्य नखः

दँय्दसं जुया वयाच्वंगु नेपालभाषा साहित्य नखःया प्यक्वःगु संस्करण किपुली जुइगु जूगु दु । किपू नगरपालिकाया ग्वाहालिं जुइगु थुगुसीया ज्याझ्वः ‘किपू नगरपालिका प्यक्वःगु नेपालभाषा साहित्य नखः’या नामं जुइ ।

नेपालभाषा साहित्ययात थपु यायेगु ताः तयाः सन्ध्या टाइम्स पिथना प्रा.लिया प्रकाशन नेपालभाषा टाइम्स न्हिपौपाखें दँय्दसं न्यायेका वयाच्वंगु साहित्य नखः थुगुसी थ्व हे वइगु ने.सं. ११४२ चिल्लाथ्व ८ व ९ (शुक्रवाः व शनिवाः) निन्हुयंकं जुइ । थुगुसीया ज्याझ्वः उलेज्या व सफू विमोचन, हनाज्याझ्वः, सम्पदा भ्रमण, अन्तक्र्रिया, रचना पाठ व सांस्कृतिक ज्याझ्वः यानाः थीथी न्हय्गू सेसनय् न्ह्याइ । न्हापांगु सेसनय् उलेज्या व सफू विमोचन जुइ ।

किपू न्याम्हसिमाय् च्वंगु नेपालभाषा एकेदेमिया हलय् जुइगु उलेज्या समारोहय् पाहाँ कथं जनकवि दुर्गालाल श्रेष्ठ, येँ महानगरपालिकाया मेयर विद्यासुन्दर शाक्य, किपू नगरपालिकाया मेयर रमेश महर्जन, उपमेयर सरस्वति खड्का रिजाल झायादी । थुगु सेसनय् नेपालभाषाया थीथी विधाया न्यागू सफू विमोचन यायेगु ज्याझ्वः दु । ज्याझ्वलय् पूर्णराम मुनंकर्मिया निबन्ध सफू ‘नेवाः गौरव’, महाकवि गिरिजाप्रसाद जोशीं च्वयातःगु थीथी उपन्यास मुना ‘गिरिजाप्रसादया उपन्यास’, रामभक्त कायस्थया हाइकु मुना ‘लखय् लूगु किचः’, स्नेह साय्मिया चिबाखं मुना ‘स्नेह साय्मिया चिबाखं’ व राजेन्द्र कुमार ‘पुता’या सांस्कृतिक उपन्यास ‘खिउँफल्चा’या विमोचन जुइ ।

साहित्य नखःया न्हापांगु न्हिया उलेज्या व विमोचन ज्याझ्वः बाहेक मेगु ज्याझ्वः किपूया लाय्कुलिइ जुइ । उलेज्या ज्याझ्वः लिपा सहभागीपिं सकलें किपू नगरपालिकाया सम्पदा भ्रमण यासें किपूया लाय्कुलिइ थ्यनेवं मेगु ज्याझ्वः न्ह्याइ । लाय्कुलिइ जुइगु ज्याझ्वलय् ‘नेवाःऋतु म्ये’यात कयाः वरिष्ठ संगितज्ञ रामकृष्ण दुवाललिसे संगीतकःमि पवित्र कसाःनं अन्तक्र्रिया यानादी । थ्व लिपा नीम्हं मल्याक साहित्यकारपिंसं थःथःगु रचना पाठ यानाः न्यंकादी । ज्याझ्वःया लिपांगु सेसन कथं ख्यालः, छधाः प्याखं क्यनेगु लिसें सांगितिक ज्याझ्वः जुइ ।

अथेहे निन्हुया नखः किपुया ऐतिहासिक थाय् पांगाय् हनीगु जुइ । पांगाया सम्पदा भ्रमण यासें न्ह्याइगु ज्याझ्वःया झ्वलय् ‘किपूया सांस्कृतिक सम्पदाय् पर्यटकीय सम्भावना’ व ‘नेपालभाषाया पठनपाठनपाखें साहित्ययात तिबः’ विषयय् निगू अन्तक्र्रियात्मक ज्याझ्वः जुइ । कीर्तिमानी सगरमाथा आरोही पत्रकार कल्पना महर्जन सहजकर्ता जुयादीगु पर्यटकीय सम्भावना विषयक अन्तक्र्रियाय् वरिष्ठ संस्कृतिविद प्रयागमान प्रधान, किपू नगरपालिका वडा नं. २ या अध्यक्ष रमेशमान डंगोल व नेवाः लहनाया अध्यक्ष राजमान मानवं ब्वति कयादी । अथेहे पत्रकार, साहित्यकार सुरेश किरण सहजकर्ता जुयादीगु नेपालभाषा पठनपाठन विषयक अन्तक्र्रियाय् यल महानगरपालिका स्थानीय पाठय्क्रम विकास समितिया सहसंयोजक तुलसीलाल सिंह, यँे महानगरपालिका शहरी योजना आयोगया दुजः गुजेश्वरी श्रेष्ठ व किपु नगरपालिका शिक्षा समितिया दुजः डा. वज्रमुनि वज्राचार्यं ब्वति कयादी ।

स्थानीय तहय् स्थानीय पाठ्यक्रम कथं नेपालभाषा ब्वंकेगु व्यवस्था यासें नेपालभाषाया विकासं ज्वः मदुगु योगदान यानादीपिं येँ महानगरपालिकाया मेयर विद्यासुन्दर शाक्य, यल महानगरपालिकाया मेयर चिरिबाबु महर्जन, किपू नगरपालिकाया मेयर रमेश महर्जन व उपमेयर सरस्वति रिजाल खड्कायात थुगु ज्याझ्वःया दथुइ तःजिक हनेगु ज्याझ्वः जुइ ।

निन्हुया न्हिकुन्हुया ज्याझ्वलय् नं नीम्हं मल्याक साहित्यकारपिंसं बाखं, चिनाखं, हाइकु, गजल, मुक्तक आदि न्यंकादीसा थुकुन्हु नं सांस्कृतिक–सांगीतिक ज्याझ्वः जुइ ।

सांस्कृतिक–सांगीतिक ज्याझ्वलय् लक्ष्मीकुमार महर्जन, रामकृष्ण खड्गी व भिमसेन रिसालया स्वपु ख्यालः लिसें लक्ष्मीकुमार महर्जनया छधाः प्याखं न्ह्यब्वइगु जुइ । ख्यालकय् लोकंह्वाःम्ह हास्य कलाकार रवि डंगोलया लिसें वरिष्ठ व न्हूपिं कलाकारपिनि अभिनय स्वयेखनी ।

अथेहे ज्याझ्वलय् किपू आइडलया सहभागीपिं लिसें नांजाःपिं म्ये हालिमिपिंसं म्येँ न्ह्यब्वइ । नांजाःपिं म्ये हालामिपिं हरिशरण सायमि, सतिस महर्जन, निशा देशार, रत्नशोभा महर्जन, सरिता शाही, रानीशोभा महर्जन, दीपा महर्जन, रोजी श्रेष्ठ, स्वस्ति महर्जन, राजेश महर्जन, मथुरा महर्जन, राजेन्द्र श्रेष्ठ लिसें किपू आइडलया विजेता व सहभागीपिंसं थःथःपिनिगु म्ये न्ह्यब्वइगु ज्याझ्वः दु । अथेहे किपू नगरपालिका वडा नंं १० या अध्यक्ष अमन महर्जनं स्टाय्ण्डअप कमेडी न्ह्यब्वइगु ज्याझ्वः नं दु ।

निन्हुयंकंया ज्याझ्वः जःछि नेपालभाषाया सफू ब्वज्या जुइसा नेवाः नसाज्वलंया स्टल नं दइ ।