प्रधानयात ज्वंगु विरुद्ध नेवाः समुदाय आक्रोशित

येँ – जातीय विभेद याःगु द्वपं बियाः येँया छम्ह स्थानीय नेवाः नागरिकयात ज्वनाः कुना बिउगु खँयात कयाः नेवाः समुदाय आक्रोशित जूगु दु ।

छगू सञ्चार माध्यमय् ज्या याइम्ह रुपा सुनार नांयाम्ह मनुखं थःत कामीया म्ह्याय् जूगु कारणं क्वथा बालं मबिउ धइगु द्वपं बियाः स्थानीय सरस्वती प्रधान विरुद्ध उजुरी तःगु खःसा वहे उजुरीया छानबिन यायेगु लागिं धकाः प्रहरीं मय्जु प्रधानयात ज्वनाः कुना बिउगु खः ।

प्रधानयात ज्वना यंकूगु खँयात कयाः स्वनिगःया नेवाः समुदाय आक्रोशित जूगु दु । ज्वना तःम्ह प्रधानयात तुरुन्त त्वःतेमाःगु सः तसें नेवाः समुदाय सतकय् समेत कुहां वयेगु मनःस्थितिइ थ्यनाच्वंगु खँ सीदुगु दु ।

थुगु घटनायात कयाः सामाजिक सञ्जालय् नं व्यापक रूपं वहस शुरु जूगु दु । सुयातं क्वथा बालं बीगु वा मबीगु धइगु घरपतिया नैसर्गिक अधिकार खः धासें क्वथा बालं मबिउगु हे कारणं सुं घरपतियात कारवाही यायेगु धइगु वयागु मानव अधिकार हनन् यायेगु खः धकाः नं सः तया हःगु दु ।

सुनारया उजुरीपाखें पीडित जूम्ह सरस्वती प्रधानं सुनारयात छुं कथंया दुव्र्यवहार याःगु, क्वथां पितिना छ्वःगु, ध्यबा बैना कायेधुंकाः लित बिउगु थेंज्याःगु छुं हे ज्या मयाःगु खँ सीदुगु दु । स्वयम् सुनारं जारी याःगु थःगु भीडियोलय् समेत थज्याःगु छुं घटना जुल धयातःगु मदु । उकिं केवल क्वथा बी मखु धाःगु हे आधारय् प्रधान विरुद्ध उजुरी तयेगु पाय्छि मजूगु तर्क सर्वसाधारणं तया हःगु दु ।

प्रधानयात म्हसिउपिं मनूतय्सं धाः कथं वय्कः व्यवहारिक रुपं सुयातं अज्याःगु भेदभाव याइम्ह मनू मखु । वय्कः नेपाःया पुलांम्ह फुटबल कासामि नं खः । नेपाःया मिसा फुटबलया राष्ट्रिय टीमय् च्वनाः म्हिते धुंकूम्ह कासामि खः । सामान्य आर्थिक हैसियत दुम्ह वय्कः थौंकन्हय् फुटबल सम्बन्धी संस्था एन्फाय् हे चीधंगु पदय् ज्या याना च्वनादीगु दु । अन वय्कःलिसे कामी, द्यःला आदि मेमेगु नं कथित क्वय्या जातियापिं आपालं कर्मचारीत ज्या यानाच्वंगु दु । उमित प्रधानं गबलें नं भेदभावपूर्ण व्यवहार मयाःगु खँ वय्कःया सहकर्मीतय्सं धाःगु दु । ५८ दँया वैंसय् थ्यनाच्वंम्ह प्रधानयात हिरासतय् तःगु खँय् एन्फाया मेपिं कर्मचारीत समेत आक्रोशित जुयाच्वंगु खँ सीदुगु दु ।

मय्जु प्रधान विरुद्ध जूगु थ्व घटनायात कयाः स्वनिगलय् स्थानीय छेँथुवाःतय्गु हक अधिकार संरक्षणया लागिं स्वनातःगु संस्थापाखें नं पहल यानाच्वंगु खँ सीदुगु दु ।

उखे दलितयात क्वथा बालं मबिउगु खँय् उजुरी दर्ता जूगु व घरपतियात ज्वनाः कारवाही समेत शुरु याःगु थ्व प्रकरणयात दलित अधिकारया लागिं आन्दोलित अभियन्तातय्सं धाःसा अझ सशक्त रुपं न्ह्यःने यंकेगु तयारी यानाच्वंगु खँ सीदुगु दु । उमिसं थ्व मुद्दाय् साथ बीगु लागिं नागरिक आन्दोलनया न्ह्यलुवातलिसे नं संवाद न्ह्याकाच्वंगु खँ सीदुगु दु ।

जातीय विभेद नेपाःया छगू प्राचीन कुरीति खः । गांपाखे दलित समुदाययात सार्वजनिक देगलय् तकं दुकाइ मखु । दलितयात देगलय् तकं दुमकाइपिं पुजारीतय्त गबलें कारवाही मजुइथाय् येँया सोझासिधा नेवाः समुदायया छम्ह दुजः विरुद्ध कारवाहीया पलाः न्ह्याकूगु खँय् धाःसा नेवाः समुदायं थुकियात नं छगू भेदभाव हे खः धकाः सः तया हःगु दु ।