झिम्हं नेवाः सुपरस्टार
येँ(नेपालभाषा टाइम्स)÷नेपालभाषा संकिपा ख्यःया बहुचर्चित व बहुप्रतिक्षित ‘नेवाः सुपर स्टार’या घोषणा याःगु दु । मंगलवाः कालिमातिस्थित सोल्टी ब्यांक्वेटय् जूगु छगू विशेष ज्याझ्वःया दथुइ नेवाः सुपर स्टारया घोषणा याःगु खः ।
ग्लोबल नेवाः नेटवर्कया ग्वसालय् जूगु ज्याझ्वलय् मूपाहांकथं नांजाःम्ह ख्यालिजुजु मदनकृष्ण श्रेष्ठ झायादीगु खः । नेवाः सुपर स्टारया निंतिं मिजंपाखे न्याम्ह व मिसापाखे न्याम्ह कलाकार छनोट यानाः मनोनयनय् लाःगु खः ।
ज्याझ्वलय् दकलय् न्हापां मनोनयनय् लाःपिं सकलें कलाकारं थःथःगु म्हसीका न्ह्यब्वःगु खःसा वयां लिपा प्रत्येक कलाकारं थःथःगु प्रतिभा न्ह्यब्वःगु खः । ज्याझ्वलय् मनोनयनय् लाःपिं मिजं कलाकारय् भोगेन्द्र मानन्धर, सुरज व्यञ्जनकार व रुपेन्द्र श्रेष्ठं म्येँ न्यंकादीगु खःसा राजु महर्जन व आर्यम नकःमिं अभिनय न्ह्यब्वयादीगु खः । अथे हे मिसा कलाकारय् मनोनयनय् लाःपिं अन्नपूर्णेश्वरी श्रेष्ठ, हिसिला महर्जन, भिंतुना जोशी, रजनी खड्गी व रोजिना सुवाल न्याम्हेसिनं हुलाप्याखं न्ह्यब्वयादीगु खः ।
मिसा कलाकार व मिजं कलाकार छम्ह छम्हेसित म्हतिं छगू छगू लख तका दांलिसें नेपालभाषा संकिपा ख्यःया नेवाः सुपर स्टार घोषणा यायेगु धयातःगु खःसां ज्याझ्वलय् मनोनयनय् लाःपिं सकलें कलाकारयात नेवाः सुपर स्टार घोषणा याःगु खः । थुकथं मनोनयनय् लाःपिं सकलें कलाकारयात नेवाः सुपर स्टार घोषणा यासें छगू लख दां नं दामासाहीकथं सकलें कलाकारयात नीद्वः तकाया ल्याखं दां लःल्हाःगु खः ।
ज्याझ्वःया कजि सुरेन्द्र तुलाधरं नेवाः सुपर स्टारया घोषणा यानादीगु खःसा थुगु ज्याझ्वःया संरक्षकपिंसं दसिपौ व मूपाहां ख्यालिजुजु श्रेष्ठं दां सिरपाः लःल्हानादीगु खः ।
नेवाः सुपर स्टारया घोषणा थनिं न्यादँ न्ह्यः याःगु खः । उगु इलय् यलया सिलौटे रिसोर्टय् जूगु नेवाः कलाकारतय् गुँभ्वय्या दथुइ मिसापाखे न्याम्ह व मिजंपाखे न्याम्ह कलाकार मनोनयन याःगु खः ।
ज्याझ्वलय् नेवाः सुपर स्टारया निंतिं छगू छगू लख दांया अक्षय कोषया निंतिं ग्वाहालि यानादीपिंत नं संरक्षकया दसिपौ लःल्हाःगु खः ।
LEAVE YOUR COMMENTS