नेवाः संगीत दबूया लसता हना

येँ (नेपालभाषा टाइम्स) – नेवाः टिभी एचडी टेलिभिजनय् न्ह्यानाच्वंगु सांगीतिक ज्याझ्वः ‘नेवाः संगीत दबू’ नीन्यागूगु ब्व थ्यंगु लसताय् वंगु मंगलवाः छगू लसता ज्याझ्वः जुल ।

टेलिभिजनलिसें नेवाः मिडिया क्लबया नायः नवीन जोशीया सभापतित्वय् न्ह्याःगु ज्याझ्वलय् ख्यालिजुजु मदनकृष्ण श्रेष्ठ मूपाहांकथं झायादीगु खः । अथे हे ज्याझ्वलय् लोककवि राजभाई जकःमि विशेष पाहांकथं व नेपाःया सांगीतिक ख्यःया लोकंह्वाःपिं संगीतकःमिपिं  रिष्ठ संगीतकार धनबहादुर गोपाली, मनराजा नकःमि, राजु सिंह व जुगल डंगोल पाहांकथं झायादीगु खः ।

संगीत दबू ज्याझ्वः न्ह्याकामिलिसें निर्माता नापं म्येँ हालामि गंगादेवी महर्जनं लसकुस यानादीगु ज्याझ्वलय् मूपाहां, पाहांपिंसं नीन्याप्वाः देवा त्याकाः ज्याझ्वःया उलेज्या यानादीगु खः । मूपाहां ख्यालिजुजु श्रेष्ठं राजनीति स्वयां नं सांगीतिक ख्यः तसकं च्वन्ह्याःगु जक मखसे संगीत ख्यः च्वय्या दर्जाय् नं लाः धयादिसें थ्व सम्बन्धी घटनालिसे स्वाःगु लुमन्ति नं न्यंकादीगु खः ।

ज्याझ्वलय् मूपाहां श्रेष्ठं पाहांपिंलिसें टेलिभिजनय् न्ह्यानाच्वंगु उगु ज्याझ्वःया प्राविधिक पुचः व ज्याझ्वःयात निरन्तर प्रायोजन याना वयाच्वंगु व्यापारिक संस्थायात सुभाय् पौ देछानादीगु खःसा ज्याझ्वः न्ह्याकामि महर्जनं मूपाहांयात सुभाय् पौ लःल्हानादीगु खः ।

सम्बन्धित बुखँ

LEAVE YOUR COMMENTS