लकडाउनया इलय् ब्रम्हत्वालय् वःपिं निम्ह स्थानीयया निगरानीइ

येँ –पेप्सीकोलाया सनसिटी अपार्टमेन्टय् च्वनाच्वंपिं निम्हेसित लन्दनं लिहां वःगु थ्यंमथ्यं लछि लिपा नं कोरोना संक्रमण खनेदयेवं स्वनिगः स्थानीयत थाय्थासय् पिनेवःपिं मनूत खनाः सचेत जुया वःगु दु । थ्वहे झ्वलय् येँया वन्दे–व्रम्हत्वा लागाय् लकडाउनया इलय् हे तराई नं वःपिं निम्ह मनूतय्त निगरानीइ तःगु दुसा बाफलय् च्वनाच्वंम्ह छम्ह विदेशं लिहां वःम्ह मनूयात कयाः नं स्थानीयपिंसं चिउताः प्वंकूगु दु ।

येँया १२ वडाय् लाःगु व्रम्हटोल–वन्दे लागाय् तराई मूलया निम्ह मनूत म्हिगः थ्यंकःवःगु खः । लकडाउनया इलय् हे उपिं थ्यंकःवःगु सिइवं स्थानीय मनूत वनाः उमित कोरोना परीक्षण याकेबिउगु खँ १२ वडाया अध्यक्ष विकास डंगोलं कनादीगु दु । उमित आः उपिं च्वनाच्वंगु थासय् हे होम क्वारेन्टाइनय् तयाः रिपोर्ट पिया च्वनागु खँ वय्कलं धयादीगु दु । उमिगु रिपोर्ट थौं बहनी वा कन्हय् दुने वइगु खँ दु । लकडाउनया हे इलय् पिनें मनूत दुहां वःगुलिं वन्देय् स्थानीयत थःपिं हे कथि ज्वनाः पिवाः च्वंवयेगु सुरु नं याःगु दु ।

अथेहे येँया बाफलय् नं अस्ट्रेलियां वःम्ह छम्ह ल्याय्म्ह पिहां पिहां वयाच्वंगु धासें स्थानीय मनूतय्सं वयागु छेँय् वनाः सचेत याःवंगु खँ धाःगु दु ।