ख्वप जनप्रतिनिधिया निदँया कार्यकाल

ख्वप – ख्वप नगरपालिकाय् निर्वाचित जनप्रतिनिधिया निदँया कार्यकालय् जूगु गतिविधियात कयाः जानकारी बीगु ल्याखं छगू ज्याझ्वः जुल । ज्याझ्वःया उलेज्या नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं उलेज्या यानादीगु खः । ज्याझ्वःया मूपाहां रोहितं ख्वपया वडा नं. १ निसें १० तक थीथी उपभोक्ता निर्माण समितिइ च्वनाः ज्या यानादीपिंत सुभाय् पौ लःल्हानादिल ।

लिसें उगु हे ज्याझ्वलय् ख्वप नगरपालिकाया उत्कृष्ट झिम्ह कर्मचारीयात नगदसहित सम्मान यानादीगु खः । ज्याझ्वलय् नवासें वय्कलं च्वय् नं छुं बी धकाः आशाकुति पहः क्यनाच्वनेगु स्वयां राजनीतिक दलया नीति निर्देशनय् जनताया सरसल्लाह कयाः स्थानीय तहं ज्या याना वनेमाः धयादिल ।

पार्टी नेतातय्सं खुँ, गुण्डा, बा¥हमासे त्वतकेगु निंतिं दबाव बिउसां अज्याःगु ज्या गबलें नं याये मजिउ धासें थम्हं नं थौंतक गबलें अज्याःगु ज्या मयानागु धयादिल । ख्वपया प्रमुख जिल्ला अधिकारी नारायणप्रसाद भट्टं जनप्रतिनिधिं ल्यं दुगु स्वदँया कार्यकालय् नं थःपिंत ग्वाहालि याइगु विश्वास प्वंकादिल ।

वय्कलं अपराध मुक्त जिल्ला दयेकेत ख्वपय् नेवाः जातिया विशेषता, उद्यमशीलता, अनुशासन, कला, संस्कृति, धर्म, सांगीतिक सहरया बनोट, सहकार्य, सहिष्णुता लिधंसा जुयाच्वंगु धयादिल । ख्वप नगरपालिकाया प्रमुख सुनिल प्रजापतिं सभापतिया थासं प्रगति प्रतिवेदन न्ह्यब्वयादीगु ज्याझ्वलय् उपप्रमुख रजनीजोशी, महानगरीय प्रहरी परिसरया प्रमुख एसपी हिमालयकुमार श्रेष्ठपिंसं नं नवानादीगु खः ।