पूर्व न्यायाधीशतय् वक्तव्यं तरंग, प्रम ओलीया भाषणं न्यायालय प्रभावित जूगु द्वपं

येँ (नेपालभाषा टाइम्स) – प्रधानमन्त्रीपाखें याःगु संसद विघटन विरुद्ध सर्वोच्च अदालतया प्यम्ह पुलांपिं प्रधानन्यायाधीशतय्सं पित बिउगु मंकाः वक्तव्ययात केपी ओली पक्षं कडा प्रतिक्रिया बीवं थ्व वक्तव्य विवादया विषय जूगु दु। ओली पक्षं वक्तव्यया विरोध यायेवं सर्वसाधारणपाखें ओलीया नं आलोचना याना हःगु दु ।

पुलांपिं प्रधान न्यायाधीशपिं मिनबहादुर रायमाझी, अनुपराज शर्मा, कल्याण श्रेष्ठ व सुशीला कार्कीं शुक्रवाः छगू मंकाः वक्तव्य जारी यासें वर्तमान संविधान कथं प्रधानमन्त्रीपाखें संसद विघटन याये फइ मखु, संसद विघटन असंवैधानिक खः धइगु धापू पित पित बिउगु खः । वय्कःपिंपाखें थज्याःगु वक्तव्य वयेवं प्रम ओली पक्षं अतिकं आक्रोशित जूगु खनेदु। सर्वोच्च अदालतय् सुनुवाई जुयाच्वंगु मुद्दाया विषयय् उकथं टिप्पणी यायेगु पाय्छि मखु धइगु बिचाः ओली पक्षं न्ह्यःने तया हःगु दु। सामाजिक सञ्जालय् छुं मनूतय्सं थज्याःगु अभिव्यक्ति बिउगु कारणं वय्कःपिंत राज्यं बियातःगु पेन्सन सुविधा समेत कटौती यायेमाः धइगु बिचाः समेत तयाहःगु दु ।

प्रधानमन्त्रीया प्रेस सल्लाहकार सूर्य थापां समेत वय्कःपिनि आलोचना यासें सामाजिक सञ्जालय् स्टाटस च्वयाहःगु दु। तर सल्लाहकार थापायात धाःसा आपाःसिनं सामाजिक सञ्जालय् हे ब्वः बियाहःगु दु । थौंकन्हय् स्वयम् प्रधानमन्त्री ओलीं हे थीथी थासय् वनाः भाषण यायेगु झ्वलय् संसद पुनस्र्थापना जुइ हे मखु, याये फइ हे मखु धकाः न्ववायेगु ज्या यानाच्वंगु दु, थुकिं सर्वोच्च अदालत प्रभावित जुइ लाकि मजुइ धइगु न्ह्यसः तयाः प्रधानमन्त्री व मन्त्रीतय्सं हे सर्वोच्चयात प्रभावित यायेत्यन धकाः यक्वस्यां धया हःगु दु ।

लिसें थःपिनि वक्तव्ययात कयाः विवाद पिहां वयेवं वक्तव्य बिउपिं पूर्व प्रधानन्यायाधीशतय्सं नं थुकिं सर्वोच्चया फैसला प्रभावित मजुइगु दावी याना हःगु दु। थौंकन्हय् थःपिं न्याय सम्बन्धी छुं नं जिम्मेवारीइ मदुगु व सामान्य नागरिक सरह जुइधुनागु जुयाः देय्या महत्वपूर्ण मुद्दाय् सामान्य नागरिकं थें थःगु बिचाः तयागु खः धकाः स्पष्टीकरण बियाहःगु दु। वय्कःपिंसं धयादीगु दु, ‘बिचाः तयेगु नागरिकया अधिकारयात सुनां नं कुण्ठित याये दइ मखु ।’

वक्तव्य बियादीपिं प्यम्हं पुलांपिं न्यायाधीशपिं थःथःगु कार्यकालय् महत्वपूर्ण फैसलात यानाः स्वच्छ छबी कायम यानातःपिं खः । वय्कःपिंसं बियादीगु थ्व मंकाः वक्तव्ययात देय् या बौद्धिक ख्यलं लसकुस याःगु दु। वय्कःपिनि थ्व वक्तव्यं देय्या न्याय ख्यलय् नं तरंग ब्वलंका बिउगु दु ।