भाटभटेनी सुपरमार्केटय् निरन्तर ठगी

येँ (रासस) – कोरोना भाइरसया संक्रमणया जोखिमया इलय् नं उपभोक्तात तःधंगु सुपरमार्केटपाखें निरन्तर ठगे जुइ मालाच्वंगु दु। वाणिज्य, आपूर्ति तथा उपभोक्ता संरक्षण विभागं याःगु बजार अनुगमनया झ्वलय् नं आधुनिक उपकरण जाडन यानातःगु धाःगु भाटभटनीइ उपभोक्तात निरन्तर ठगे जुइमालाच्वंगु प्रतिवेदन सार्वजनिक जूगु दु ।

विभागं न्हियान्हिथं जुइगु अनुगमनया विवरण वेबसाइटपाखें सार्वजनिक यायेगु याना वयाच्वंगु दु। वंगु चैत ११ गते कोरोना भाइरसया संक्रमणपाखें बचे जुइत लकडाउन लागू यायेधुंकाः लिपाया अवधिइ भाटभटेनीया निगू शाखा कारवाहीलय्लाःगु दु। थ्व इलय् भाटभटेनीया नक्साल व अनामनगर शाखा कारवाहीलय् लाःगु खः । भाटभटेनी सुपरमार्केटं उपभोक्तापाखें न्हूगु ढंगं ध्यबा अप्वः म्हयेगु यानाच्वंगु दु ।

भाटभटेनीं सहुलियत दरं सामान विक्री यायेगु दावी याःसां उपभोक्तापाखें धाःसा ध्यबा कयाः लित बीबलय् धाःसा भीडभाडया मौकाय् लाकाः ठगे यायेगु न्हूगु शैली छ्यलाच्वंगु वानेश्वरया पीडित उपभोक्ता राजेन्द्र कार्कीं धयादिल । अनामनगर शाखां सामान न्यानाः ध्यबा लित बीबलय् भीडभाडया मौकाय् लाकाः ९० तका म्हो लित बीगु वय्कलं जानकारी बियादिल ।

भाटभटेनी सुपरमार्केटपाखें सामान कयाः बिल पुलाः लिहां वयेबलय् काउन्टरय् भीडया मौकाय् लाकाः बीमाःगु स्वयां म्हो जक ध्यबा लित बिउगु खँ वय्कलं कनादिल । कोरोनाया कारणं भीडभाडय् मच्वने धकाः भाटभटेनीइ माइकिब यानाच्वंगु दइ । भाटभटेनीपाखें ध्यबा कयाः लिहां वयाबलय् धाःसा म्हो जक ध्यबा दइगु पीडित उपभोक्तातय्सं गुनासो याःगु दु। सिसिटिभी क्यामेरातक जडान यानातःगु धाःगु भाटभटेनीइ थ्व विषयय् गुनासो यात धाःसा सुनुवाइ मजुइगु खँ उपभोक्तातय्सं धाःगु दु ।

भाटभटेनीया अनामनगर शाखाया व्यवस्थापक अजय लामां उपभोक्तातय्त बीमाः स्वयां म्हो जक ध्यबा बिउगु उजुरीया आधारय् सिसीटिभी फुटेज परीक्षण यानाबलय् कमजोरी खनेदुगु स्वीकार यानादी । म्हो ध्यबा लि बिउम्ह कर्मचारीयात लिपा थज्याःगु गल्ती यात धाःसा कारवाही यायेगु चेतावनी बियागु खँ वय्कलं धयादिल ।

तःधंगु सुपरमार्केट जूसां नं भाटभेटनीइ गुणस्तरीय सामान मदुगु खँ चुच्चेपाटीया डोल्मा शेर्पां गुनासो यानादिल । भाटभटेनीपाखें हयागु तरकारी दुने दुनें ध्वगिना वनाच्वनीगु उपभोक्तातय् गुनासो दु। भाटभटेनीं थःम्हं हे प्याकिङ्ग याःगु दालया प्याकेटय् नं यक्व हे फि, चागः दइगु  पभोक्तातय् गुनासो दु। थज्याःगु सुपरमार्केटय् पारदर्शी रुपं गुणस्तरीय सामान विक्री याकेत निरन्तर बजार अनुगमन यायेमाःगु माग उपभोक्तातय् दु ।

उपभोक्ता मञ्चया केन्द्रीय दुजः रोशन पोखरेलं धाःसा तःधंगु सुपरमार्केटय् बजार अनुगमन औपचारिकताय् जक सीमित जुइगु खँ कनादी। थज्याःगु सुपरमार्केटलिसे स्वानाच्वंपिं राजनीतिक व्यक्तित्वया कारणं नं विभाग अनुगमन यायेत ग्याइगु वय्कःया द्वपं दु। लखौं वंगु चैत ११ गते लकडाउन सुरु जुइवं भाटभटेनीया मू सुपरमार्केट नक्सालय् विभागं याःगु बजार अनुगमनया झ्वलय् म्याद फुइधुंकूगु सामान मियातःगु लुइकूगु खः । छुं ई न्ह्यः भाटभटेनीया अनामनगर शाखाय् नं थज्याःगु म्याद फुइधुंकूगु सामान लुइकाः कारवाही यानागु खँ विभागया प्रवक्ता रवीन्द्रप्रसाद आचार्यं धयादी ।

थ्व बारे प्रतिक्रिया कायेत भाटभटेनीया मू शाखा नक्सालया अधिकारीयात सम्पर्क तयाबलय् अनया कर्मचारीत वं वयात वं वयात चिइकाः छुं प्रतिक्रिया मबिउ । भाटभटेनीया थौंकन्हय् अनामनगर, नक्साल, महाराजगञ्ज, त्रिपुरेश्वर, पाटन, सातदोबाटो, कोटेश्वर, ख्वप, बौद्ध व कलंकी यानाः झिथाय् शाखा दु । अथेहे स्वनिगलं पिने धरान, विराटनगर, बुटवल, नारायणघाट, पोखरा, भैरहवा, नेपालगञ्ज यानाः न्हय्गू थासय् शाखा दु ।

सम्बन्धित बुखँ

LEAVE YOUR COMMENTS