नेपाः पार्टी खारेजीया विरोध

येँ – निर्वाचन आयोगं नेपाः राष्ट्रिय पार्टी लगायत थीथी ४१ गू पार्टी खारेज यायेगु धकाः याःगु निर्णयप्रति नेपाः राष्ट्रिय पार्टीं गम्भीर आपत्ति प्वंकूगु दु । पार्टीया अध्यक्ष डा. विजय सैंजुं थन छगू विज्ञप्ति पिकासें थ्व आपत्ति प्वंकादीगु खः ।

निर्वाचन आयोगं नेपाः पार्टी लगायत थीथी पहिचान पक्षधर दलतय्त बिना पूर्व जानकारी गलत ढंग व गलत मनसायं खारेज यायेगु संविधानया धारा १७ उपधारा १ (ग) विपरित जूगु नं धाःगु दु ।

संविधानसभाया चुनावय् ब्वति कयाः नेपाः पार्टीया सभासदया ल्हाःचिं तयाः वर्तमान संविधान जारी जूगु खः । विज्ञप्तिइ थ्व खारेजीया र्निणय संविधानया धारा २६९या उपधारा २, ३, ४, ५ कथं नं गलत जूगु खँ धयातःगु दु । आयोगयात इलय् हे विचाः यायेत इनाप यासें विज्ञप्तिइ कोरोना महामारीं यानाः लकडाउन जुयाच्वंगु इलय् आयोगं दर्ता नवीकरण मयात धइगु त्वहः तयाः दल दर्ता खारेज यायेगु ज्यां देसय् कायम जुयाच्वंगु बहुदलीय व्यवस्थायात हे कमजोरयाइगु खँ नं धयातःगु दु ।

विज्ञप्तिइ धयातःगु दु, ‘निर्वाचन आयोग धयागु सिडिओ कार्यालय मखुु, थथे एनजिओतय्त थें राजनीतिक दल खारेज याये दइ मखु । थ्वः पूर्णत संविधान विपरित जूगु दु ।’

आयोगयात दल दर्ता खारेजीया थ्व निर्णय तत्काल लित कायेत माग यासें विज्ञप्तिइ थुकिं यानाः लिपा पिहां वइगु छुं नं कथंया बांमलाःगु लिच्वःया जिम्मेवारी निर्वाचन आयोग हे जुइगु ख्याच्वः नं बियातःगु दु । लिसें थ्व निर्णय लित कायेत आयोगयात उजं बीगु लागिं सरकारयात नं इनाप यानातःगु दु ।

निर्वाचन आयोगं स्वदँ तक ल्याःचाः बुझे मयाः धइगु कारण क्यँसें थ्व दल दर्ता खारेज याना बिउगु खः । थुकी छगू इलय् चर्चाय् वःगु चुरे भावर नां तयातःगु स्वंगू पार्टीया दर्ता नं खारेज याना बिउगु दु ।