ओलीलिसे जसपाया वार्ता ?

येँ- जनता समाजवादी पार्टी व नेपाल कम्युनिष्ट पार्टी (एमाले) दथुइ सरकार गठन यायेत कार्यदल गठन जुल धकाः वःगु समाचारयात जसपां खण्डन याःगु दु । नेकपा एमाले व जनता समाजवादी पार्टीं सत्ता साझेदारीया निंतिं वार्ता पुचः गठन यात धकाः वःगु समाचारयात जसपाया नेता लक्ष्मणलाल कर्णं खण्डन यानादीगु खः ।

थीथी सञ्चार माध्यमय् सत्ता साझेदारीया निंतिं एमालेपाखें सुवास नेम्वाङ व बिष्णु पौडेल, जसपापाखें लक्ष्मणलाल कर्ण व सर्वेन्द्रनाथ शुक्ला दुगु वार्ता टोली गठन जूगु समाचार पिहां वःगु खः । तर जसपा नेता कर्णं जेलय् कुनातःम्ह जसपाया सांसद रेशम चौधरीयात त्वःतकेगु बारे खँल्हाबल्हा यायेत थःपिं बालुवाटार वनागु खँ धयादीगु दु ।

म्हिगः सिंहदरबारय् च्वंगु जसपा संसदीय दलया बैठकय् एमालेलिसे सत्ता सहकार्य यायेगु निंतिं कार्यदल दयेकूगु खँ पिहां वयेवं नेता कर्णं थःपिंसं सरकारलिसे सत्ता सहकार्यया निंतिं मखुसें चौधरीयात त्वःतेमाः धइगु विषयय् जक सहलह यानागु खँ कना दीगु दु ।

थ्वहे झ्वलय् जसपाया केन्द्रीय दुजः गंगानारायण श्रेष्ठं नं सरकार दयेकेगु कार्यदल बारे पार्टीं छुं कथंया निर्णय मयाःगु खँ धयादीगु दु । ‘नेपालभाषा टाइम्स’ लिसे खँ ल्हासें वय्कलं धयादिल, ‘२३ गते जसपाया नेतापिं लिसे सरकार गठन यायेगु निंतिं कार्यदल गठन जुल धकाः समाचार वःगु दु, तर वकुन्हु जिमिसं सरकार लिसे सत्तासाझेदारीया निंतिं मखुसें ज्वनातःम्ह थारु नेता चौधरीयात त्वःतेमाः धकाः सरकारयात इनाप याः वनागु खः, तर सरकारी पक्षं उकियात मेगु हे कथं प्रचार याना बिल ।’

जसपा नेता कर्णं प्रधानमन्त्रीया सल्लाहकार व नेतातय्सं थःपिं प्रधानमन्त्रीया प्रतिनिधि खः, वार्ता यायेत झासँ धाःगुलिं वनागु खः धासें रेशम चौधरीलगायत मधेश आन्दोलनया झ्वलय् जेलय् कुनातःपिंत त्वःतकेगु निंतिं सहलह यायेत थःपिं वनागु खँ कनादीगु दु ।
सर्वोच्च अदालतं एमाले व माओवादी केन्द्रयात पुनः अस्तित्वय् हया बीवं प्रम ओलीया सरकार अल्पमतय् लाःगु खः । उकिं सत्ता साझेदार मालाच्वंम्ह ओलीयातसाथ बीगु लागि जसपा न्ह्यःने वन धकाः म्हिगःनिसें समाचार पिहां वःगु खः ।

समीकरणया निंतिं जसपा खुल्ला

जसपां गुगु दललिसे सहकार्य यायेगु धइगु बारे निर्णय यायेत पार्टीया न्याम्ह शीर्षस्थ नेतायात जिम्मेवारी बिउगु दु । म्हिगः सिंहदरबारय् च्वंगु संसदीय बैठकं संघीय परिषदया अध्यक्ष डा. बाबुराम भट्टराई, अध्यक्षपिं महन्त ठाकुर, उपेन्द्र यादव, वरिष्ठ नेता राजेन्द्र महतो व अशोक राईयात जिम्मेवारी बिउगु दु । थ्वहे झ्वलय् जसपाया नेता राजेन्द्र महतों सत्ता समिकरणया निंतिं फुक्कं दललिसे सहलह यायेत पार्टी खुल्ला जूगु खँ धयादीगु दु । पत्रकारतलिसे खँ ल्हायेगु झ्वलय् वय्कलं धयादिल, ‘जिपिं सत्ता समिकरणया निंतिं खुल्ला दु, स्वंगुलिं पार्टीलिसे सरकार दयेकेगु विषयसं खँ ल्हायेगु जुइ ।’

सम्बन्धित बुखँ

LEAVE YOUR COMMENTS