‘विकास निर्माणय्या खँय् सकले छप्पँ जुइ’

ख्वप – प्रतिनिधि सभाया सांसद महेश बस्नेतं सुकुम्बासीतय्गु समस्या ज्यंकाः हनुमन्ते सफाई अभियान नापं सुरक्षित अरनिको राजमार्ग निर्माण यानाः ख्वपयात समृद्ध दयेकेत थः सदां प्रतिवद्ध जुयाच्वनागु खँ कनादीगु दु । शनिवाः सुथय् जुल्फादेवी आमा समूह व नयाँ विहानी महिला समूहया मंकाः ग्वसालय् शुशिला भैरव स्थान कटुञ्जेय् जूगु खुल्ला हिदान ज्याझ्वलय् मूपाहांया थासं न्ववानादिसें वय्कलं थ्व खँ धयादीगु खः ।

वय्कलं थ्व इलय् नेपाःया दक्कलय् तःधंगु प्रदर्शनी स्थल ख्वपय् हयाः हजार रोपनी जग्गाय् अन्तर्राष्ट्रिय रंगशाला दयेकेगु ज्या न्ह्यानाच्वंगु खँ कनादिसें उकिया लागिं नं आः लः व धःया समस्या ज्यंकेगु लागि थःपिसं प्यंगू करोड दां व्यवस्था याना ज्या यानाच्वनागु खँ कनादिल ।

वंगु असार २७ गते थें ११३ मिलि मिटर वाः वःसां तबि नं आः ख्वपय् दुवान जुइगु समस्या ज्यनी कथं थःपिसं ज्या याना च्वनागु न्ह्यथनादिसें सुं नं नेता व राजनीतिक कार्यकर्तां ख्वपया विकास व निर्माणया ज्यायात आः असफल याये फइमखु धयादिल । वय्कलं ख्वपया विकास व अरनिको राजमार्गया वैकल्पिक राजमार्ग दयेकेत ज्या जुयाच्वंगु नं कनादिल ।

उगु हिदान ज्याझ्वलय् मुक्कं चय्छम्हेसिनं हिदान यानादीगु खः । जुल्फादेवी आमा समूहया अध्यक्ष रत्ना थापाया सभापतित्वय् जूगु हिदान ज्याझ्वलय् सहभागीतय्त मूपाहां महेश बस्नेतं दसि पौ लःल्हनादिल । स्थानीय व्यक्तितय्सं उगु ज्याझ्वलय् हे सांसद महेश बस्नेत समक्ष छगू ज्ञापन पौ नं लःल्हायेगु ज्या जूगु खः ।