संक्रमितपिनि पाखें जोखिम मन्त – इपिडिमिलोओजी प्रमुख

सम्पर्कय् वःपिं सकसिया लिसे स्वापू तयेमफुनि - प्रहरी

येँ – सरकारं नेपालय् कोरोना भाइरसया संक्रमण खनेदुपिं मनूतलिसे सम्पर्कय् वःपिं सकलें मनूतय्त विश्व स्वास्थ्य संगठनया मापदण्ड कथं पहिचान यायेधुनागु व उपिं सुयाकें नं कोरोना खनेमदुगु खँ धाःगु दु ।

‘कन्ट्याक्ट ट्रेसिङ’ यायेगु जिम्मा लाःगु इपिडिमिओलोजी तथा सरुवा रोग नियन्त्रण महाशाखाया प्रमुखं बिबिसीलिसे खँ ल्हासें देशय् दुने दुहां वयेधुंकाः निसें छेँ व समुदायय् थ्यंगु अवस्थाय् तक पीडिततय् सम्पर्कय् थ्यंपिं व्यक्तितय्त म्हसिइका उमिगू नमूना संकलन यायेधुनागु खँ धाःगु दु ।

वय्कलं संक्रमितत लिसे यात्रा यानाः नेपाः वःपिं मध्ये निम्हेसिया लिसे स्वापू तयेमफुगुलिं उमिगु परीक्षण धाःसा यायेमखंनिगु खँ नं धयादीगु दु । तर संक्रमितलिसे स्वापू दुपिं मनूतय्त म्हसिइकेगु ज्इा क्वचायेधुंकूगु व छुं नं जोखिम मदुगु खँ नं धयादीगु दु ।

नेपालय् आःतक खनेदुगु गुंगू घटनाय् छम्ह संक्रमितयात लनेधुंकूगु दु । थुपिं मध्ये च्याम्ह विदेशं लिहां वःपिं खःसा छम्हेसित धाःसा नेपालय् सरे जूगु खः ।

स्वास्थ्य मन्त्रालयं याःगु नियमित पत्रकार सम्मेलनय् प्रवक्ता डा. विकास देवकोटां विश्व स्वास्थ्य संगठनया मापदण्ड कथं म्हसीकेगु ज्या क्वचाःगु खँ धयादीगु दु । इपिडिमिओलोजी व सरुवा रोग नियन्त्रण महाशाखां स्वास्थ्य मन्त्रालययात पत्रचार यानाः सम्पर्कय् वःपिं म्हसिइकेगु ज्या क्वचायेधुंकूगु जानकारी बीधुंकूगु दु । महाशाखाया महानिर्देशक डा. बासुदेव पाण्डें बिबिसीलिसे खँ ल्हासें धाःगु दु, ‘जिमिसं च्याम्हं संक्रमित मनूया सम्पर्कय् वःपिं मनूतय्त म्हसिइकेगु ज्या क्वचायेके धुनागु दु । व डब्ल्यूएचओया मापदण्ड कथं उपिं लिसे सम्पर्कय् वःपिं मनूतय् परीक्षण यानाबलय् सुयाकें नं कोरोना भाइरसया संक्रमण खनेमदु ।’

वय्कलं भारतया मुम्बइपाखें वःम्ह छम्ह संक्रमितया सम्पर्कय् वःपिं १४ म्ह, भारतया हे उत्तराखण्डं वःम्हे मेम्ह क्वारेन्टाइनय् सम्पर्कय् वःपिं झिंनिम्ह व नेपाः दुने हे संक्रमित जूम्ह छम्ह मिसाया सम्पर्कय् वःपिं मेपिं न्हय्म्हेसिया नं परीक्षण यानागु खँ कनादीगु दु ।

वय्कलं धयादिल, ‘भारतं रेलपाखें वःपिनि हकय् उमिसं यात्रा याःगु इलय् सुया सुया नाप सम्पर्कय् वल धयागु धायेफुगु अवस्था मदु । तर नेपालय् होटल निसें क्वारेन्टाइनस्थल व छेँ तक म्हसिइका आवश्यक मापदण्ड कथं परीक्षण यानागु दु ।’

थ्वयां न्ह्यः अधिकारीतय्सं फ्रान्सपाखें दोहा जुया वःम्ह १९ दँया नेपाली विद्यार्थी व कतार एयरवेजपाखें चैत ४ गते येँ वःपिं १५८ मध्ये गुलिखे यात्रुत सम्पर्कय् मवःगु खँ धया वयाच्वंगु खः । महानिर्देशक पाण्डें विमानपाखें वःपिं मध्ये निम्हेसिया जक कन्ट्याक्ट ट्रेसिङ जुइमफुगु थःके जानकारी दुगु खँ बिबिसीयात धयादिल ।

वय्कलं थुगु संक्रमण खनेदुगु अवधि निवाः स्वयां अप्वः दयेधुंकूगुलिं छुं जोखिम मदुगु अनुमान थःपिंसं यानागु खँ धयादीगु दु । नेपाल प्रहरीं संक्रमित यात्रुत च्वनावःगु स्वंगू अन्तर्राष्ट्रिय उडान व निगू आन्तरिक उडानय् दुपिं मनूतय्त म्हसीकेत ग्वाहालि याःगु खः ।

प्रहरी तथ्यांकय् धाःसा इपिडिमिओलोजी तथा सरुवा रोग नियन्त्रण महाशाखाया स्वयां फरक खनेदुगु दु । कोभि १९ संक्रमण यात्रु च्वनावःगु कतार एयरवेजया विमानय् च्वनावःपिं स्वम्हेसिया पहिचान जुइ ल्यं दनिसा एयर अरेबियाया उडानपाखेनिम्ह व विस्तरा एयरया १९ जनाया पहिचान ल्यं दनिगु खँ नेपाल प्रहरीया प्रवक्ता एसएसपी उमेशराज जोशीं धयादीगु दु । वय्कःया कथं संक्रमित यात्रुलिसें निगः आन्तरिक उडानय् सवार जुयावःपिं सछिम्हं मल्याक यात्रु मध्ये २२ म्हेसिया लिसे नं सम्पर्क जुइफुगु मदुनि ।