न्हूगु राजधानी गन तयेगु ? पाँचखालया न्हूगु हे वस्ती राजधानी शहरया लागिं प्रस्तावित

येँ – देय्या केन्द्रीय राजधानी दुगु लिसें आपालं सांस्कृतिक सम्पदाय् समेत धनी प्रदेश नम्बर ३ या राजधानी हेटौंडां सारे यानाः मेथाय् तयेगु चर्चा शुरु जुइवं राजधानी गन तःसा जी धइगु खँय् वहस नं आरम्भ जूगु दु ।थ्वहे झ्वलय् प्रदेश नम्बर ३ य् एमालेया सांसद डा. अजयक्रान्ति शाक्यं हेटौंडां राजधानी सारे यानाः मेथाय् तयेगु खःसा न्हूगु हे खाली थाय् ल्ययाः अन न्हूगु शहर निर्माण यायेमाःगु अवधारणा न्ह्यःने हयादीगु दु । थुकिया लागिं वय्कलं पाँचखाल लागाया मन्डन भ्याली, दोलालघाट, पलाञ्चोक क्षेत्रयात राजधानी दयेकाः थ्व थाय्या न्हूगु शहरया रूपय् विकास याना यंकेमाःगु प्रस्ताव तयादीगु दु । थ्व प्रस्तावयात आः पार्टी दुने आधिकारिक रुपं दर्ता हे यायेत्यनागु खँ नं वय्कलं ‘नेपालभाषा टाइम्स’ यात कनादिल ।

वय्कलं धयादिल, ‘थ्व विषयय् पार्टीया आधिकारिक निकाय ३ नम्बर प्रदेश कमिटीइ राजधानी पाँचखालय् तये माःगु व प्रदेशया नां ‘नेपालमण्डल’ जुइमाः धकाः विधिवत् प्रस्ताव हे दर्ता यायेत्यनागु दु । वयां लिपा पार्टीइ नं वहसया विषय जुइ ।’पाँचखालयात न्हूगु राजधानीया रुपय् प्रस्तावित यानागु बारे वय्कलं धयादी, ‘थ्व थाय् ३ नम्बर प्रदेशया ठ्याक्क दथुइ लाः । उकिं यातायात सञ्जाल दयेसातकि सकसितं पायक जुइ । थ्व विशेष यानाः ह्याउँगु चा दुगु लागा खः गन बांलाक उब्जनी जुइ मखु । उकिं थ्व थाय् कृषि सिबें शहर हे दयेकेत अप्वः ज्या वः । थ्व लागा चीनलिसे सतीगु कारणं चीनं रेल हयेसातकि छक्वलं विकास याये फइ ।’आः काभ्रेय् राजधानी सरे हे याःसां उकियात नं अस्थायी रुपं जक छ्यले माःगु सुझाव नं वय्कलं बियादीगु दु ।

राजधानी काभ्रेय् हइगु सम्भावना
प्रदेश नम्बर ३ या राजधानी हेटौंडां सरे यानाः काभ्रेय् हे तइगु खँ सीदुगु दु । न्हूगु सरकारं राजधानी काभ्रेय् तयेगु लागिं आवश्यक तयारी समेत शुरु याःगु दु । सूत्रया कथं हेटौंडां सारे याना हःगु राजधानी थिमिइ तयेगु लागिं एमाले नेता महेश बस्नेतं यानाच्वंगु कुतः नं जारी हे दनि । तर थिमिइ राजधानी तये हल धाःसा ख्वपया सांस्कृतिक म्हसीका ध्वस्त याइगु सम्भावना दुगुलिं अन राजधानी तये जी मखु धकाः एमाले दुने हे मेगु सः नं थ्वयाच्वंगु दु । उकिं आःयात राजधानी काभ्रेया पन्ति–धौख्यः लागाय् तयेगु लागिं हे तयारी जुयाच्वंगु दु । अनया आईटी पार्कयात संसद भवन दयेकाः मेगु संरचना उकिया जःखः हे निर्माण याना यंकेगु बारे नं सहलह जुयाच्वंगु दु । सूत्रतय्सं धाः कथं राजधानी सरे यायेधुंकाः तिनि प्रदेशया नां छु तयेगु धइगु विषय प्रवेश जुइफु ।