शिक्षाविद् मास्केया झ्वाता अनावरण
येँ- विश्व निकेतन उच्च माध्यमिक विद्यालयया पुलांम्ह प्रधानाध्यापकलिसें शिक्षाविद् गम्भिरमान मास्केया झ्वाता विद्यालय परिसरय् पलिस्था याःगु दु । विश्व निकेतन–गम्भिरमान फाउन्डेशनं मदुम्ह शिक्षाविद् मास्केया झ्वाता पलिस्था याःगु खः ।
‘गुणस्तरीय शिक्षाया निंतिं हातेमालो’ धइगु मूनारा ज्वनाः गठन यानातःगु फाउन्डेसनया ग्वसालय् वंगु शनिवाः जूगु ज्याझ्वलय् विद्यालयया पुलांपिं प्रधानाध्यापकपिं सत्यनारायण राजभण्डारी, कमला शाक्य, निर्मल गिरी वय्कःया अतिकं स्याःन्याःम्ह पासा डा. हेरम्बबहादुर राजभाण्डारीं मंकाःकथं झ्वाताया अनावरण यानादीगु खः । उगु इलय् विद्यालयया मेम्ह पुलांम्ह प्रधानाध्यापक बेखालाल श्रेष्ठं भिडियो सन्देश बियादीगु खः ।
वि.सं. २००३ सालय् नरमान श्रेष्ठं थःगु हे छेँया छेँदिइ नीस्वनादीगु उगु विद्यालयय् शिक्षाविद् मदुम्ह मास्कें २०२३ निसें २०५१ सालतक प्रधानाध्यापक जुयाः सेवा यानादीगु खः । थगुने मंसिर १६ गते ८६ दँया उमेरय् मदुम्ह मास्केया दकिलाया पुण्य तिथि लाकाः विद्यालय परिसरय् झ्वाता पलिस्था याःगु खः ।
ज्याझ्वलय् विद्यालय व्यवस्थापन समितिया नायः गोपाल श्रेष्ठ, पुलांम्ह प्रधानाध्यापक राजभण्डारी, पुलांम्ह शिक्षिका मञ्जु अधिकारी, शिक्षाविद् मास्केया छय् डा. सफला मास्के, प्रधानाध्यापक हेरम्ब कँडेल लगायतं मदुम्ह मास्कें शिक्षा ख्यलय् बियादीगु योगदानयात कयाः चर्चा यानादीगु खः ।
झ्वाता दयेका दीम्ह कलाकार श्याम तुलाधरनापं डिजाइन व निर्माणया ज्याय् ग्वाहालि यानादीपिंत नं हनापौ लःल्हाःगु ज्याझ्वलय् पुलांम्ह विद्यार्थी सुरज पौडेलं लसकुस व विन्द्रा कक्षपति प्रधानं सुभाय् देछानादीगु खःसा फाउन्डेसनयात विद्यालयया पुलांपिं विद्यार्थी, शिक्षकशिक्षिका लगायत थीथी संघसंस्थापाखें ग्वाहालि नं लःल्हाःगु खः ।
LEAVE YOUR COMMENTS