मोतिलक्ष्मी उपासिकाया किपा दुगु पाँय्म्वः पिदन

येँ –  भिंतुना गुथिं दँय्दसं थें थुगुसी नं न्हूदँ नेपाल संवत् ११४०या लसताय् वहःया पाँय्म्वः पिथंगु दु । गुथिं थुगुसी नेपालभाषा साहित्य ख्यःया न्हापांम्ह मिसा साहित्यकार नापं बाखं च्वमि मोतिलक्ष्मी उपासिकाया किपा दुगु पाँय्म्वः पिथंगु खः । गुथिं म्हिगः श्री कुमारि माजुया ल्हातं उगु पाँय्म्वः पितब्वज्या याःगु खः ।

गुथिया सकल पदाधिकारी व जःपिं थनया बसन्तपूस्थित कुमारि छेँय् वनाः श्री कुमारि माजुया दर्शन यासें दक्षिण छानाः पाँय्म्वः सार्वजनिक याःगु खः । गुथिं दँय्दसं न्हूदँया लसताय् थुकथं भिंगु वहया पाँय्म्वः पिथनेगु याना वयाच्वंगु दु । गुथिं दकलय् न्हापां नेपाल संवत्या प्रवर्तक राष्ट्रिय विभूति शंखधर साख्वाःया किपा दुगु पाँय्म्वः पिथंगु खः ।

नेपालभाषा ख्यलय् ज्वःमदुगु योगदान बियादीपिंत सम्मान यायेकथं गुथिं थुकथं पाँय्म्वः पिथनेगु याना वयाच्वंगु खःसा पाँय्म्वलय् छखे प्रतिष्ठित व्यक्तिया किपा व मेखे गुथिया लोगों अंकित जुयाच्वंगु दु । गुथिपाखें थुगुसी पिथंगु पाँय्म्वः झिप्यंक्वःखुसी खः । मुक्कं १५ ग्राम वहःया पाँय्म्वःया बारे गुथिया नायः रविन्द्र तुलाधरं जानकारी बियादीगु खः ।

सम्बन्धित बुखँ

LEAVE YOUR COMMENTS