स्वंगू मापदण्डय् लाःसा छेँथुवालं नं राहत काये खनी : मेयर शाक्य
येँ – येँ महानगरपालिका दुने सरकारपाखें बीगु राहत इनेगु ज्याय् छेँथुवाः (घरपति) व बालं च्वनीपिं (डेरावाल) धकाः छुं नं कथंया भेदभाव मजुइगु खँ धाःगु दु । सरकारं बीगु अज्याःगु राहत बालं च्वनीपिंत जक दइगु व छेँथुवाःयात मदइगु धकाः पिहां वयाच्वंगु भ्रमयात कयाः स्पष्ट यासें येँ महानगरपालिकाया मेयर विद्यासुन्दर शाक्यं थ्व खँ धयादीगु खः ।
वय्कलं कनादीकथं राहत गज्याःपिंत दइ धइगु सवालय् मनपां छगू मापदण्ड दयेकूगु दु । उगु मापदण्ड कथं ‘असहाय’, ‘अतिविपन्न’ व ‘दैनिक ज्यालादारीइ ज्या याइपिं, यानाःमुक्कं स्वंगू पुचः दयेकातःगु दु । थ्व स्वंगू पुचःया मापदण्ड दुने लाःपिं छेँथुवाः वा बालं च्वनीपिं न्ह्याम्ह जूसां नं वयात राहत दइगु खँ मेयर शाक्यं स्पष्ट यानादिल ।
‘सकलें बालं च्वनीपिं विपन्न जुइ मखु, सकलें छेँथुवाः सम्पन्न नं जुइमखु,’ नेपालभाषा टाइम्स लिसे खँल्हासें वय्कलं धयादिल, ‘यदि सुं नं थ्व मापदण्ड दुने लाःसा वं वडाय् वनाः थःत वइगु राहत काये फइ । थ्व वयात कानूनं बियातःगु अधिकार खः ।’
‘थ्व स्वंगू मापदण्ड मध्ये ‘अतिविपन्न’ धइगु पुचलय् लाःम्ह खःसा वं उकिया लागिं वडाया सिफारिस छगू कायेमाःगु नियम दु । झीगु येँय् दुने छेँ दुम्ह खःसां नं अतिविपन्नपिं मनूत नं च्वनाच्वंगु दु । छेँ दत धायेवं विपन्न मखु धइगु जुइ मखु । वय्कःपिंसं नं वडाया सिफारिस छगू कयाः राहतया लागिं नां बियादीसां जिउ’ मेयर शाक्यं धयादिल ।
घरपतितय्त राहत दइ मखु धकाः थीथी सञ्चार माध्यमतय्सं भ्रम ब्वलंकाच्वंगु खँय् सचेत यासें वय्कलं धयादिल, ‘अज्याःगु हल्लाया लिउने सुं नं वनादीमते । महानगरपालिकां दयेकूगु थ्व मापदण्ड दुने लाःसा घरपतिं नं राहत काये खनी । मापदण्ड दुने मलाःसा डेरावालं नं काये खनी मखु ।’
थः थ्व मापदण्ड दुने लाःसा राहत कयादीत व थः मापदण्डय् मलाःगु खःसा मेपिं मापदण्डय् लाःपिं जःलाखःला, थःथिति वा सुं म्हसिउपिं दुसा वय्कःपिंत खँ थुइकाः राहत कायेगु ज्याय् ग्वाहालि यानादीत नं मेयर शाक्यं इनाप यानादिल ।
लिसें वय्कलं राहत कायेगु ज्याय् भीडभाड जुलधाःसा कोरोना ल्वय् पुनीगु सम्भावना यक्व दुगु जुयाः राहत काःवनेबलय् फयांफछि भीडभाड मयायेत व शान्त एवं शिष्ट ढंगं कयादीत नं सकसितं इनाप यानादीगु दु ।
LEAVE YOUR COMMENTS