ने. सं. ११४४ कछलागा सप्तमी -

एमसीसी टेबुल यायेत आलटाल

येँ -अमेरिकी मिलेनियम च्यालेन्ज कर्पोरेशन (एमसीसी) थौैं प्रतिनिधिसभाय् टेबल जुइगु जूगु दु । म्हिगः प्रधानमन्त्री शेरबहादुर देउवां सभामुख अग्निप्रसाद सापकोटायात कार्यव्यवस्था परामर्श समितिया बैठक सःतेत इनाप यायेवं सभामुख सापकोटा थौं कार्यव्यवस्था परामर्श समितिया बैठक सःतूगु खः ।

प्रतिनिधिसभाया थौंया बैठकया कार्यसूची तयार यायेगु नितिं ११ः३० बजे कार्यव्यवस्था समितिया बैठक सःतूगु खः । थौं च्वनीगु प्रतिनिधिसभाया सम्भावित कार्यसूचीइ एमसीसीयात धाःसा दुथ्याकातःगु मदु । कार्यसूचीइ थारु आयोगया प्रतिवेदन पेश यायेगु व मदुपिं पुलांपिं सांसदपिनिगु शोक प्रस्ताव पारित यायेगु धलः जक दुथ्याकातःगु दु ।

प्रधानमन्त्री शेरबहादुर देउवां म्हिगः कांग्रेसया संसदीय दलया बैठकं हे सभामुख सापकोटायात फोन यानाः कार्यव्यवस्था परामर्श समितिया बैठक सःतेत इनाप यानादीगु खःसा बैठकय् वय्कलं थःपिं एमसीसी सम्झौता सदनं अनुमोदन याकेगु पक्षय् दुगुलिं एमसीसी टेबल यायेत सभामुखयात धायेधुनागु खँ धयादीगु खः ।

संसदीय दलया बैठकय् सम्बोधन यायेगु झ्वलय् प्रधानमन्त्री देउवां एमसीसी संसदं अनुमोदन यायेगु खँय् फुक्कं दलया ग्वाहालि चूलाइगु विश्वास नं प्वंकादीगु खः । बैठक लिपा कांग्रेस महामन्त्री गगन थापां प्रधानमन्त्री देउवां एमसीसी सम्झौता टेबल यायेगु सन्दर्भय् एमालें षडयन्त्र यानाच्वन धकाः धाःगु खँय् न्ह्यसः तसें प्रधानमन्त्री देउवां थःपिसं गुगु एमसीसी सम्झौता संसदय् टेबल यायेत्यनागु खः, थ्व एमाले अध्यक्ष केपी ओली नेतृत्वया सरकारं २०७६ साल असार २० गते हे संसदय् दर्ता याःगु खः धासें उगु इलय् ओली सरकारं न्ह्यःने न्ह्याकेमफुगु विधेयकयात वर्तमान सरकारं न्ह्यःने यंकेबलय् गुकथं षडयन्त्र जुइ धकाः न्ह्यसः तयादीगु खः ।

थ्वहे झ्वलय् कांग्रेसया प्रवक्ता प्रकाश शरण महतं एमसीसी सम्झौता संसदय् टेबल जुइगु खँ धयादीगु दु । पार्टी केन्द्रीय कार्यालयय् म्हिगः च्वंगु कार्यसम्पादन समितिया बैठकया निर्णय सार्वजनिक यायेगु झ्वलय् प्रवक्ता महतं सरकारं एमसीसी टेबल यायेत इनाप यायेधुनागु व सभामुखं प्रतिवद्धता प्वंकूगु खँ धयादीगु खः ।
सञ्चारकर्मीपिसं थौंया कार्य–व्यवस्था परामर्श समितिया बैठकय् एमसीसी टेबल यायेगु खँ दुमथ्याः धकाः न्यंगु न्ह्यसःया लिसलय् धयादिल, ‘आः थप मजूसा लिपा जुइ, तर कन्हय् टेबल जुइ ।’ वय्कलं गठबन्धन दललिसे सहमतिइ हे एमसीसी संसदं अनुमोदन जुइगु दावी नं यानादीगु दु ।