
येँ – जापानया टोकियोय् जुयाच्वंगु ३२ औं गृष्मकालीन ओलम्पिकय् नेपाःया यात्रा क्वचाःगु दु । शुक्रवाः सुथय् जूगु १०० मिटर दौडया धेंधेंबल्लाखय् एथ्लेटिक्स कासामि सरस्वती चौधरी न्हापांगु चरणं हे पिने लाःवनेवं नेपाःया ओलम्पिक यात्रा क्वचाःगु खः । सरस्वतीं ब्वति काःगुपालय् मुक्कं गुम्ह कासामिं ब्वति खः, गुकी सरस्वती १२.९१ सेकेन्डं दौड पुवंकाः च्यागूगु थासय् लाःगु खः । चौधरीं थःम्हेसिनं दयेकातःगु रेकर्ड सिबें नं कमजोर प्रदर्शन याःगु खः । चौधरीं १३ औं सागय् १२.५५ सेकेन्डया रेकर्ड दयेकूगु खः ।
थुगुसीया ओलम्पिकय् नेपाःपाखें मुक्कं न्याम्ह कासामि ब्वति काःगु खः । ओलम्पिकया थुगुसीया उपलब्धि धयागु स्वम्ह कासामिं थःपिनिगु राष्ट्रिय कीर्तिमानय् सुधार हःगु खः । नेपाःया पौडी कासामि एलेक्जेन्डर शाह(एलेक्स) व गौरिका सिंहं व सुटिङया कल्पना परियारं राष्ट्रिय कीर्तिमान दयेकल । पौडी कासामि एलेक्जेन्डरं थःम्हं तयातःगु ५५.३८ सेकेन्डया रेकर्ड त्वाःथलाः ५३.४१ सेकेन्डया राष्ट्रिय कीर्तिमान दयेकूगु खःसा गौरिका सिंह १.००.६२ सेकेन्डया रेकर्ड त्वाःथलाः १.००.११ या राष्ट्रिय कीर्तिमान दयेकल ।
अथे हे सुटिङ कासामि कल्पना परियारं ६१४.५ अंकया रेकर्ड त्वाःथलाः ६१६.८ अंकया राष्ट्रिय कीर्तिमान दयेकल । जुडोय् ब्वति काःम्ह सोनिया भट्टयात रुसी कासामि इरिना इप्पोनं १ मिनेट १६ सेकेन्डय् बुकूगु खः । टोकियो ओलम्पिकय् एलेक्जेन्डर व गौरिकां युनिभर्सालिटी कोटा व कल्पना, सोनिया व सरस्वतीं वाइल्ड कार्ड मार्फत ब्वति काःगु खः ।
नेपालपाखें ओलम्पिकय् संगिना वैद्य व दिपक विष्ट निम्ह जक तप्यंक छनोट जूपिं कासामि खः । नेपालं सन् १९६४ य् टोकियोय् हे जूगु ओलम्पिकय् न्हापांखुसी ब्वति काःगु खः।
टोकियो ओलम्पिकय् शीर्ष थाय्या निंतिं चीन, जापान व अमेरिका दथुइ धेंधेंबल्लाः जुयाच्वंगु दु । शुक्रवाः सनिलय् तक चीन १८ स्वर्ण, ९ रजत व ११ कास्य सहित शीर्ष थासय् दु । अथे हे जापान १५ स्वर्ण,४ रजत व ७ कास्य यानाः निगूगु व अमेरिका १४ स्वर्ण, १६ रजत, व ११ कास्य यानाः स्वंगूगु थासय् दु ।
LEAVE YOUR COMMENTS