विमानय् झंगः जूवल धाःपिंत कारवाही
येँ (नेपालभाषा टाइम्स)- येँ (नेपालभाषा टाइम्स)÷ इन्जिन फेल जूसां विमानय् झंगः जूवयाः मि च्याःगु धकाः भ्रम न्यंकूपिं फ्लाई दुबईया निम्ह कर्मचारीयात नेपाल नागरिक उड्डयन प्राधिकरणं कारवाही याःगु खः । प्राधिकरणं फ्लाइ दुबईया कन्ट्री म्यानेजर व एयरपोर्ट म्यानेजरयात त्रिभुवन विमानस्थलय् दुहां वयेमदइ कथं कारवाही याःगु खः ।
सोमवाः बहनी ९ः२० बजे त्रिभुवन विमानस्थलं ब्वःगु फ्लाई दुबईया विमानया छगः इन्जिन ब्वःगु छुं ई लिपा हे फेल जूगु खः । इन्जिन विस्फोट जूगु सः कोटेश्वर, यलय् थ्यंक हे तायेदुगु खःसा विमानय् मि नं च्याःगु खः । विमान मि च्याःगु यक्व हे भिडियोय् सामाजिक सञ्जालय् वःगु खः । विमानय् मि च्याःगु खनेदयेवं विमान दुर्घटना जुइन धकाः चिन्ता प्वंकाहःगु खः । तर छुं ई लिपा हे फ्लाई दुबईया आधिकारिक
ट्विटरय् विमानय् झंगः हाःगुलिं मि च्याःगु व विमानय् छुं समस्या मदुगु धकाः ट्विट वःगु खः । विमान म्हिगः हे छगः इन्जिन फेल जूसां दुबईलय् हे यंकूगु खः ।
विमान दुने यात्रुतय् रुवावासी
म्हीग येँनं दुबईया लागिं ब्वःगु फ्लाइ दुबईया विमानय् मि च्यायेवं विमान दुने ब्वलंगु दृश्यया भिडियो सार्वजनिक जूगु दु । छम्ह यात्रीं सार्वजनिक याःगु उगु भिडियोलय् विमान दुने कुँ त्याः पिहां वयाच्वंगु खनेदुसा उकिया नापनापं यात्रीत ह्वाँय् ह्वाँय् ख्वया हःगु सः नं तायेदु । तर उगु भिडियो वहे विमान दुनेया खः लाकि मखु धइगु खँ धाःसा पुष्टि मजूनि ।
LEAVE YOUR COMMENTS