प्रहरी दुने नं व्यापक संक्रमण : आः वर्क फ्रम होम

येँ (नेपालभाषा टाइम्स) – कोरोना नियन्त्रणया निंतिं अग्रपंक्ति च्वनाः खटे जुइमाःपिं प्रहरीतय्के हे कोरोना संक्रमण अप्वयेवं नेपाल प्रहरीं विशेष कथंया ‘छेँय् हे च्वनाः ज्या यायेगु (वर्क फ्रम होम)’ सुविधा बिउगु दु ।

‘छेँय् च्वनाः ज्या यायेगु’ धाःसां प्रहरी छेँय् हे च्वनेगु मखुसें छेँनं तप्यंक थःगु ड्युटी दुगु थासय् वनेगु खः । सुयातं संक्रमण जुल धाःसा मेपिं प्रहरीतय्त नं संक्रमण मजुइमा धयागु ल्याखं ड्युटी यायेगु थाय्या लिक्कसं तुं छेँ वा क्वथा दुपिं प्रहरीतय्त आः ज्याकुथी मवँसे तप्यंक ड्युटीस्थलय् वनेगु व ड्युटी क्वचायेकाः तप्यंक छेँय् लिहां वनेगु सुविधा बिउगु खः ।

अथेहे सशस्त्र प्रहरीं स्वनिगलं पिने च्वनाच्वंपिं सुरक्षाकर्मीतय्त ब्यारेकं पिने च्वनेत प्रतिबन्ध तःगु दु। सशस्त्रया प्रवक्ता राजु आचार्यया कथं स्वनिगलं पिने ब्यारेकय् च्वनाच्वंपिं सुरक्षाकर्मीयात ब्यारेकं पिहां वनाः परिवार वा थःथितिपिंथाय् च्वनेत प्रतिबन्ध तःगु दु। अथेहे स्वनिगः दुने च्वंपिं सुरक्षाकर्मीयात प्रहरीया हे गाडीं छेँय् काःवयेगु व छेँय् तये यंकेगु व्यवस्था याःगु दु ।

नेपालय् संक्रमण अप्वया वनेवं सुरक्षाय् खटे जुयाच्वंगु नेपाल प्रहरी, सशस्त्र प्रहरी व सेना सहित यानाः झिंछसलं मल्याक सुरक्षाकर्मीतय्त कोरोना संक्रमण जुइधुंकूगु दु । सुरक्षा अधिकारीतय् कथं आःतक नेपाल प्रहरीया सुरक्षाकर्मीतय्के दकलय् अप्वः संक्रमण खनेदुगु दु ।

नेपाल प्रहरीया प्रवक्ता वरिष्ठ प्रहरी उपरीक्षक कुवेरसिंह कडायतया कथं सोमवाः तक नेपाल प्रहरीया ६३८ म्हेसिके संक्रमण पुष्टि जूगु दु। थुपिं मध्ये ३८७ म्हेसिके अझं संक्रमण दनिसा २५१ म्हेसिके संक्रमण क्वलायेधुंकूगु दु ।

अथेहे सशस्त्र प्रहरीइ २९१ म्हेसिके संक्रमण पुष्टि जुइधुंकूगु दु। सशस्त्रया प्रवक्ता राजु अर्यालया कथं आः १५५ म्हेसिके संक्रमण दनिसा १३६ म्हेसिके संक्रमण क्वलायेधुंकूगु दु। अथेहे नेपाली सेनाय् २४६ म्ह सैनिकयाके संक्रमण खनेदुगु दुसा उपिं मध्ये ८४ लनाः छेँये वनेधुंकूगु दु, १६२ म्हेसिके संक्रमण ल्यं दनि ।

कोरोना महामारी नियन्त्रण यायेत सरकारं हःगु नियमत कडापूर्वक पालना याकेगु निंतिं अग्रपंक्तिइ च्वनाः ज्या यायेमाःपिं सुरक्षाकर्मीतय्के हे थुकथं संक्रमण अप्वयेवं थुकियात पनेत प्रहरीं थीथी उपाय नालेगु सुरु याःगु खँ नेपाल प्रहरीया प्रवक्ता कडायतं धयादीगु दु। वय्कलं स्वास्थ्य मन्त्रालयं दयेकूगु मापदण्ड पूवंक पालना यानाच्वनागु खँ धयादिसें ब्यारेकय् च्वनीपिं प्रहरीतय्त नये-त्वनेगु इलय् ब्लक कथं भौतिक दूरी कायम यानाः नये-त्वनेगु व्यवस्था यानागु खँ धयादीगु दु । आः संक्रमित खनेदुपिं अप्वः थें सुरक्षाकर्मीत कोरोना भाइरस नियन्त्रणया ज्याय् खटे जुयाच्वंपिं खः ।