
येँ महानगरपालिका २९ वडाय् बुधवाः राहतया निंतिं जायेकेमाःगु फारम कायेत लाइन च्वनाच्वंपिं । किपा : तेज महर्जन
येँ – येँ महानगरपालिकां नयेमखंपिं, न्हि खानाः न्हि नयेमाःपिंत जाकि, केँ, तरकारी राहत कथं बीगु धायेवं येँया थीथी वडा ज्याकुथिइ राहत काइपिनि लाइन जूगु दु । थज्याःगु लाइनय् धाःसा नयेमखंपिं जक मखु, थःगु हे छेँ दुपिं, संगठीत संस्थाय् ज्या यानाच्वंपिं तकं लाइनय् च्वं वयाच्वंगु दु ।
थौं येँ महानगरपालिका २९ वडा डिल्लीबजारय् राहत इनेगु निंतिं फारम वितरण याःबलय् नं छेँथुवाःत तकं राहत कायेत लाइन च्वं वयाच्वंगु खँ छम्ह वडासदस्यं कनादीगु दु ।
येँ महानगरपालिकाया प्रवक्ता ईश्वरमान डंगोलं नं राहतया निंतिं कमाई बांलक दुपिंसं तकं फोन यानाः दुःख बियाच्वंगु खँ धयादीगु दु । वय्कलं आः महानगरं बीत्यंगु राहत भुखाय् ब्वःबलय् थें सकसितं बिइगु मखु, ज्या मदयाः नये मखंपिं, आश्रय मदुपिं असहायपिंत जक बिइगु जूगुलिं थःगु कमाइ दुपिंसं राहतया निंतिं मधायेत इनाप यानादीगु दु ।
येँ महानगरपालिकां राहत बीगु निंतिं दयेकूगु मापदण्डय् नं स्पष्ट रुपं येँय् छेँ मदुपिं, न्हिया न्हिथं ज्या यानाः नयेमाःपिं, संगठीत संस्थाय् ज्या मयाइपिंत जक बीगु खँ धयातःगु दु । येँ महानगरपालिकाया मापदण्डय् थज्याःपिं नयेमखंपिंत याकः मनू जुल धाःसा जाकि ४ किलो, दाल १ किलो, चिकं बागू लिटर, चि छगू पाकेट, आलु प्याज १ किलो व बजि आधा किलो बी । अथेहे निम्ह निसें प्यम्हेसिया परिवार जुल धाःसा जाकि १२ किलो, दाल २ किलो, चिकं आधा लिटर, चि १ किलो, आलु प्याज ३ किलो, बजि २ किलो बी ।
अथेहे न्याम्ह व व स्वयां अप्वः परिवार दुपिंत जाकि १६ किलो, दाल ३ किलो, चिकं १ लिटर, चि १ किलो, आलु प्याज ४ किलो, बजि ३ किलो बीगु खँ न्ह्यथनातःगु दु ।
LEAVE YOUR COMMENTS